रंगशाला तयार नभएपछि विश्वकप छनोटको खेल नेपालबाट खोसियो
<p>काठमाडाैं। एशियाली फुटबल महासंघ (एएफसी) ले दशरथ रंगशालाको भौतिक पूर्वाधारमा प्रश्न उठाउँदै यहाँ हुने तय भएको विश्वकप छनोटको कुवेतविरुद्धको खेल नेपालमा नखेलिने निर्णय गरेको छ।</p>
<p>नेपालले कुवेतविरुद्ध आउँदो ३ मंसीरमा दशरथ रंगशालामा खेल्ने कार्यक्रम थियो ।</p>
<p>अखिल नेपाल फुटबल संघ (एन्फा) ले आज विज्ञप्ति जारी गरेर कुवेतविरुद्धको खेल दशरथ रंगशालामा नहुने स्पष्ट गरेको हो।</p>
<p>सन् २०२२ मा कतारमा हुने फिफा विश्वकपको दोस्रो चरणको छनोट र २०२३ मा चीनमा हुने एएफसी एशियन कप फुटबल प्रतियोगिताको छनोट अन्तर्गत् नेपालको घरेलु मैदानमा हुने तय भएको यो खेल अब ‘न्यूट्रल भेन्यू’का रूपमा अब भूटानमा हुनेछ ।</p>
<p>एएफसीको प्रतियोगिता समितिका प्रतिनिधि देङ सिओ लोङ्गले १९ कात्तिकमा दशरथ रंगशालाको निरीक्षण गरेका थिए ।</p>
<p>“निरीक्षणपश्चात प्रतियोगिताका लागि आवश्यक अन्तर्राष्ट्रिय मापदण्ड अनुसार रंगशाला तयार हुन नसकेकोले एएफसीको निर्देशनअनुसार उक्त खेल नेपालमा हुन नसक्ने व्यहोरा जानकारी गराउँदछु”, एन्फाको विज्ञप्तिमा उल्लेख छ ।</p>
<p>“सबै प्रकारको अधिकतम प्रयत्नका बाबजुद भूकम्पबाट पूर्ण क्षतिग्रस्त नेपालको एकमात्र अन्तर्राष्ट्रिय दशरथ रंगशालामा समयमा नै पुनर्निर्माण हुन र गराउन नसक्दा उक्त प्रतिष्ठित खेल नेपालमा हुन र गराउन नसकेकोमा क्षमायाचना गर्दछौं”, एन्फाका प्रवक्ता किरण राइले जारी गरेको विज्ञप्तिमा उल्लेख छ ।</p>
<p style="text-align:center"><img alt="" height="1028" src="https://www.dekhapadhi.com/storage/photos/shares/Sports/Anfa_press_release.jpg" width="840" /></p>
<p> </p>
प्रतिक्रिया दिनुहोस्
.jpg)
