Others

गृहपृष्ठ

मदन पुरस्कार वितरण आज काठमाडौं । भक्तपुरका अन्तिम मल्ल राजा हुन्, रणजीत मल्ल । उनै रणजीत युवराजदेखि राजा हुँदासम्मका कथा समेटेर योगेश राजले लेखेको ‘रणहार’ ले यस वर्षको मदन पुरस्कार प्राप्&zwj;त गरेको छ । त्यस्तै मदन पुरस्कार गुठीले ‘जगदम्बा श्री’ पुरस्कारका लागि कवि एवम् नेपाल प्रज्ञा प्रतिष्ठानका पूर्व कुलपति बैरागी काइँलालाई प्रदान गरेको छ । चार लाख रुपैयाँ राशीका दुवै पुरस्कार आज हस्तान्तरण गरिँदै छ ।  गुठीमा प्राप्त २०७५ मा प्रकाशित दुई सय ५७ पुस्तकमध्ये अन्तिम छनोटमा सात पुस्तकहरु ‘एकादेशमा’, ‘ओक्कल दोक्कल पिपल पात’, ‘ज्ञ’, ‘फातसुङ’, ‘मरीचिका’, ‘विचारको लाश’ र ‘रणहार’ परेका थिए । ति मध्ये ‘रणहार’ उत्कृष्ट ठहर भएको हो । ‘रणहार’ मा पृथ्वीनारायण शाहले उपत्यका कब्जा गर्ने क्रममा अन्तिममा भक्तपुरमाथि विजयी गरेको घटनालाई रोचक शैलीमा प्रस्तुत गरिएको छ । तेस्रो आयाम साहित्यिक अभियानका प्रारम्भकर्तामध्येका एक काइँलालाई लिम्बू भाषा तथा मुन्धुम संस्कार र संस्कृतिको अध्ययन–अनुसन्धान तथा अभिलेखीकरण गरी नेपाली वाङ्गमयको समृद्धिमा उल्लेखनीय योगदान गरेबापत कदरस्वरुप पुरस्कार प्रदान गर्न लागेको हो ।  २०१२ मा स्थापित मदन पुरस्कारबाट पहिलो पटक गद्य विधामा सत्यमोहन जोशीको ‘हाम्रो लोक संस्कृति’, सामाजिक शास्त्रमा चित्तरन्जन नेपालीको ‘जनरल भीमसेन थापा’ तथा विज्ञान विधामा बलराम जोशीको ‘अधिकविभव स्थिरविद्युत उत्पादक’ पुस्तकलाई पुरस्कृत गरिएको थियो । जगदम्बा–श्री भने रानी जगदम्बाको निधनपछि उनको स्मृतिमा २०४५ बाट दिन थालिएको हो ।