निर्माण सामग्रीको परीक्षण गर्न प्रयोगशाला बनाइने
<p>काठमाडाैं। राष्ट्रिय सतर्कता केन्द्रले एक महीनापछि निर्माण सामग्रीको परीक्षण गर्न प्रयोगशाला स्थापना गर्ने भएको छ।</p>
<p>विभिन्न आयोजनामा प्रयोग हुने सिमेन्ट, बालुवा, गिट्टी र छडको परीक्षण गर्न प्रयोगशाला स्थापना गर्न लागिएको केन्द्रका सचिव डा. ऋषिराम शर्माले जानकारी दिए।</p>
<p>अन्य निर्माण सामग्री एक महीनापछि नै परीक्षण गर्न सकिने भए पनि छडको परीक्षणका लागि तीन महिना कुर्नुपर्नेछ।</p>
<p>परीक्षणको क्रममा निर्माण सामग्रीको गुणस्तर, आयोजनामा तोकिएको मात्रा अनुसार राखे/नराखेको परीक्षण गरिने केन्द्रले जनाएको छ।</p>
<p>तीनै तहका सरकारले शुरु गरेका धेरै आयोजनामा निर्माण सामग्रीको मात्रा नमिलाउँदा गुणस्तरीय काम नभएको नागरिकको गुनासो छ।</p>
<p>प्रयोगशाला बनाउन गत आर्थिक वर्षमा केन्द्रले दुई करोड रूपैयाँको यन्त्र खरीद गरेको थियो।</p>
<p>केही सामग्री भने चार वर्ष अघि नै खरीद गरिएको थियो।</p>
<p>चालु आर्थिक वर्षको शुरुमै प्रयोगशाला सञ्चालनमा ल्याउने तयारी गरिए पनि प्रयोगशाला जलमग्न भएकाले काम हुन नसकेको केन्द्रले जनाएको छ।</p>
<p>एकहप्तामा निर्माण सामग्रीको परीक्षण सकी प्रतिवेदन दिन सकिने जनाइएको छ।</p>
<p>केन्द्रले श्रम, रोजगार तथा सामाजिक सुरक्षा मन्त्रालय रहेको भवनको भूइँतलामा प्रयोगशाला निर्माण गर्न लागेको हो।<em> रासस</em></p>
प्रतिक्रिया दिनुहोस्
.jpg)
