सभामुखकाे जिम्मेवारी सम्हाल्न सक्षम छुः उपसभामुख तुम्बाहाम्फे
<p>बाँके। प्रतिनिधिसभाका उपसभामुख शिवमाया तुम्बाहाम्फेले सभामुख पदको जिम्मेवारी सम्हाल्न आफू योग्य र सक्षम रहेको बताएकी छन्।</p>
<p>हुम्लामा संविधान कार्यान्वयनसम्बन्धी स्थानीय तहका जनप्रतिनिधिलाई तालीम दिएर काठमाडौं फर्कने क्रममा आज बाँकेको नेपालगञ्जमा आयोजित पत्रकार सम्मेलनमा उनले यस्ताे बताएकी हुन्।</p>
<p>“प्रतिनिधिसभाका सबै माननीयको सभामुखमा दाबी गर्ने हैसियत छ। सबै सक्षम हुनुहुन्छ, हाम्रो संसदीय अभ्यासमा उपसभामुखमा कार्यरत व्यक्तिले सभामुख भएर चलाएको इतिहास पनि हामीसँग छ,” उनले भनिन्, “सभामुख भएर काम गर्न र क्षमताको आधारमा अगाडि बढ्न तयार छु।”</p>
<p>संविधानमा सभामुख र उपसभामुख फरक दल र फरक लिङ्गको प्रतिनिधित्वको कुरा उल्लेख भएकाले अब सत्तापक्षले सभामुख पद लिने कुरा भयो भने संविधानले जे भनेको छ त्यो कार्यान्वयन गर्न उपसभामुख पद अरू कुनै दललाई छोडिदिनुपर्ने उनको भनाइ थियो।</p>
<p>“सभामुख सत्ता पक्षले लिन्छ भने त्यतिबेला उपसभामुखले मार्ग प्रशस्त गर्न संवैधानिक व्यवस्थाअनुसार राजीनामा गर्नुपर्ने अवस्था आउँछ,” तुम्बाहाम्फेले भनिन्, “त्यसपछि के गर्ने भन्नेबारे दलहरूसँग छलफल गरेपछि मात्रै निर्णय हुन्छ।”</p>
<p>रिक्त रहेको सभामुख पदलाई पूर्णता दिन प्रधानमन्त्रीसँग छलफल गरिरहेको जानकारी दिँदै मंसीरको तेस्रो सातातिर सभामुख पदले पूर्णता पाउने उनकाे भनाइ छ। <em>रासस</em></p>
प्रतिक्रिया दिनुहोस्
.jpg)
