विदेशमा अलपत्र परेका १३०० बढी नेपाली स्वदेश फर्किए
<p>काठमाडाैं। विभिन्न मुलुकमा अलपत्र एक हजार ३१३ नेपाली स्वदेश फर्किएका छन्। कोभिड-१९ महामारीका कारण विदेशमा अलपत्र परेका नेपालीको विभिन्न एयरलाइन्सले उद्धार चार्टर्ड उडानमार्फत उनीहरुलाई स्वदेश फर्काएका हुन्।</p>
<p>त्रिभुवन अन्तर्राष्ट्रिय विमानस्थलमा आज आवागमन र प्रस्थान दुवैगरी १५ अन्तरराष्ट्रिय चार्टर्ड उडान भएका छन्। नेपाल एयरलाइन्सले दुबईबाट २६५ र दोहाबाट १५१ यात्रु काठमाडौँ ल्याएको छ।</p>
<p>त्यस्तै कतारको दोहाबाट १५१ यात्रु नेपाल ल्याएको छ। सोही एयरलाइन्स थप नेपालीको उद्धारका लागि रियाद र दमाम प्रस्थान गरेको विमानस्थलले जनाएको छ।</p>
<p>हिमालय एयरलाइन्सले दमामबाट १५४ यात्रु तथा दुई शव नेपाल ल्याएको छ। अबुधाबीबाट १५४ यात्रु ल्याएको छ। हिमालयकै जहाजले इराकको बगदादबाट ३९ यात्रु ल्याएको छ।</p>
<p>काठमाडौँबाट बगदाद जाँदा ३६ यात्रु लगेको थियो। थप नेपालीको उद्धारका लागि हिमालयको जहाज दोहा र दमाम उडेको छ।</p>
<p>त्यस्तै कतार एयरवेजले २५१, इतिहाज एयरले अबुधाबीबाट १३८ र फ्लाई दुबईले १६१ नेपाली काठमाडौँ ल्याएको विमानस्थल कार्यालयले जारी गरेको विज्ञप्तिमा उल्लेख छ।</p>
<p>बिहीबार पनि विभिन्न देशबाट नेपालीको उद्धारका लागि आगमन र प्रस्थान दुवै गरी आठ चार्टर्ड उडान हुने विमानस्थलको तालिका छ।</p>
<p>आज आन्तरिकतर्फ पनि सात वटा चार्टर्ड उडान भए। तारा र समिट एयरका जहाज तथा मनाङ, सिम्रिक र कैलाशको हेलिकप्टरले विभिन्न गन्तब्यमा उडान गरेका हुन्।</p>
<p>रासस</p>
प्रतिक्रिया दिनुहोस्
.jpg)
