सीमाबारे सेनाको चासो
<p>काठमाडौं। भारतको नयाँ राजनीतिक नक्साबारे जंगीअड्डामा छलफल भएको छ।</p>
<p>नेपाली भूभागलाई भारतको नक्सामा पारेको विषयमा दल, नागरिक समाज, बौद्धिक वर्ग र सर्वसाधारणबीच छलफल बढेपछि नेपाली सेनाले चासो देखाएको आजको <em>अन्नपूर्ण पोष्ट</em>मा समाचार छ। </p>
<p>प्रधानसेनापति पूर्णचन्द्र थापाले नेपाली भूमि रक्षामा सुरक्षाकर्मी चुक्न नहुने भन्दै अन्य सुरक्षा निकाय प्रमुखसँग छलफल चलाएका हुन्। </p>
<p>नेपाली भूमिमा रहेको भारतीय सुरक्षाकर्मी फिर्ता पठाउने र अन्य सीमा पनि सुरक्षित गर्न कुटनीतिक एवं रणनीतिक तयारीमा सेना अग्रसर छ।</p>
<p>लिम्पियाधुरा, कालापानी र लिपुलेकमा पाँच दशकदेखि भारतीय सुरक्षाकर्मीको उपस्थिति रहेकामा कसरी फिर्ता पठाउने भन्नेबारे जंगीअड्डामा बहस भएको सैन्य स्रोतले बताएको छ।</p>
<p>प्रधानसेनापति थापाले सुरक्षा निकायका प्रमुखसँग पछिल्लो सुरक्षा अवस्था र सहकार्यबारे छलफल राखेको भए पनि भारतीय सीमा अतिक्रमणबारे बहस भएको एक सुरक्षा अधिकारीले बताए। </p>
<p>प्रधानमन्त्री केपी शर्मा ओली र उपप्रधान एवं रक्षामन्त्री ईश्वर पोखरेल पनि जंगीअड्डामा पुगेका थिए।</p>
<p>सेनाका प्रवक्ता एवं सहायक रथी विज्ञानदेव पाण्डेले सुरक्षा निकायको छलफल भएको स्वीकार गरे पनि त्यसलाई नियमित भने। </p>
प्रतिक्रिया दिनुहोस्
.jpg)
