भोजपुरमा करीब ५० करोड लागतको खानेपानी आयोजना बन्दै
<p>भोजपुर। भोजपुर सदरमुकाम तथा आसपासको क्षेत्रमा खानेपानी सुविधाको लागि करीब ५० करोडको शहरी खानेपानी आयोजनाको निर्माण शुरू भएको छ।</p>
<p>नेपाल सरकारको ७० प्रतिशत, नगरविकास कोषको २५ प्रतिशत ऋण र स्थानीय उपभोक्ताको ५ प्रतिशत गरि कूल ४९ करोड ७९ लाख ९८ हजार रूपैयाँ आयोजनाको लागत रहेको छ। </p>
<p>सो आयोजनाबाट भोजपुर नगरपालिका क्षेत्रका ५ देखि ९ र १२ वडाका दुई हजार २८० घर लाभान्वित हुने सिलिचुङ खानेपानी तथा सरसफाई मुल उपभोक्ता समितिका अध्यक्ष प्रविन कुमार सुवालले बताएका छन्। </p>
<p>अध्यक्ष सुवालले भने, “शिलान्याससँगै आयोजनाको काम शुरू भइसकेको छ, दुई वर्षभित्र काम सक्ने हाम्रो लक्ष्य छ।”</p>
<p>प्रसारण लाइन ३६ किलोमिटर र वितरण लाईन ७६ किलोमिटर गरी आयोजनाको कूल लम्बाई ११३ किलोमिटर रहेको छ। </p>
<p>आयोजना निर्माणको जिम्मा हुवासुई कन्काई जेभीलाई दिइएको छ। सो निर्माण कम्पनीलाई एक करोड २२ लाख रूपैयाँ रकम सञ्चालन खर्च भुक्तानी गरिएको छ।</p>
<p>टेम्केमैयुङ गाउँपालिका– १ तिम्माको तीनभँगाले मुहान रहेको सो आयोजना अन्तर्गत दुई वटा प्रशोधन ट्याङ्की, छ वटा इन्टेक र १० वटा पानी पोखरी निर्माण गरिने छ।<br />
</p>
प्रतिक्रिया दिनुहोस्
.jpg)
