निजगढ–काठमाडौं द्रुतमार्ग नयाँ अवधारणामा बन्ने
<p>बारा। निजगढ–काठमाडौं द्रुतमार्गको विस्तृत आयोजना प्रतिवेदन (डीपीआर) स्वीकृत भएपछि अलमलमा परेको नेपाली सेनाले अब नयाँ अवधारणाअनुसार निर्माण कार्य अघि बढाउने भएको छ।</p>
<p>नयाँ अवधारणाअनुसार सेना आफैंले तीन सुरुङ र केही ठूला पुलबाहेक सडक कालोपत्रे, नाला, कल्भर्ट, पर्खाल र अन्य पुल निर्माण गर्ने भएको हो। द्रुतमार्गको सडक फिलिङ र कटिङ सकिएको २५ किलोमिटर क्षेत्र कालोपत्रे तत्काल थालिने र सँगै नाला, पर्खाल बनाइनेछ।</p>
<p>अब द्रुत गतिमा कालोपत्रे, स–साना पुल, कल्भर्ट र पर्खाल बनाउने योजना अघि बढाइएको आयोजनाका संयोजक भरत खड्काले जानकारी दिए।</p>
<p>सेनाले निजगढदेखि ८ दशमलव ५ किलोमिटर उत्तरतर्फ सडक कालोपत्रे, कल्भर्ट र पुल निर्माण थाल्ने भएको छ। सिस्नेरीको कठिन स्थानमा निर्माण कम्पनीले पहाड फोड्नेदेखि सम्याउने काम सकेपछि सेनाले चार लेनलाई चिरा पारेर दुई लेनको बनाउने तथा फेरि चार लेनसँगै जोड्ने साथै चोभारदेखि बाग्मतीसम्म फिलिङ, कटिङसँगै कालोपत्रे गर्ने खडकाले बताए।</p>
<p>चार वर्षभित्र निर्माणको सम्पूर्ण काम सक्ने सर्तमा २०७४ साउन २७ मा द्रुतमार्ग निर्माणको जिम्मा सेनालाई दिइएको थियो। सर्तअनुसार सेनाले २७ साउन २०७८ भित्र द्रुतमार्ग निर्माणको सम्पूर्ण काम सक्नुपर्नेछ।</p>
<p>अहिले ५४ दशमलव ५१ किमी सडकमा फिलिङ, कटिङ, पर्खाल र जमिन बाँध्ने काम भइरहेको छ। <em>-रासस </em><br />
</p>
प्रतिक्रिया दिनुहोस्
.jpg)
