पूर्वमहान्यायाधिवक्ता श्रेष्ठले बहसमा भने– 'आलमलाई राजनीतिक पूर्वाग्रहले फसाइँदैछ'
<p>रौतहट। सामूहिक हत्याकाण्डको अभियोग लागेका पूर्वमन्त्री एवम् कांग्रेस सांसद मोहम्मद आफताब आलमको पक्षमा बहस गर्न रौतहट पुगेका पूर्व महान्यायाधिवक्ता रमण श्रेष्ठले राजनीतिक पूर्वाग्रहले आलमलाई फसाइएकाे बताएका छन्।</p>
<p>“जबर्जस्ती कसैलाई पनि दोषी करार गर्न मिल्दैन,” बहसका क्रममा उनले भने, “मेरो पक्षलाई राजनीतिक पूर्वाग्रहका आधारमा फसाउन खोजिएको छ।”</p>
<p>आज भएको थुनछेक बहसमा आलमका तर्फबाट बहस गर्दै श्रेष्ठले प्रहरीले बिना प्रमाण मुद्दा चलाएको भन्दै आलमलाई थुनामा राख्नुपर्ने कुनै कारण नभएको जिकिर गरेका थिए।</p>
<p>साथै उनले मिडिया र प्रहरीको चर्को आलोचना गरे।</p>
<p>सञ्चारमाध्यममा आएको कुरालाई प्रमाणका रूपमा मानेर अनुसन्धान गर्न नमिल्ने उनकाे भनाइ थियाे।</p>
<p>आज श्रेष्ठसँगै लालबाबु राय, सञ्जीवकुमार मल्लिक र अजय पटेलसमेतले बहस गरेका थिए।</p>
<p>आलमका तर्फबाट भोलि पनि वकीलहरूले बहस गर्नेछन्।</p>
<p>सरकारी वकील तथा जाहेरीकर्ताको तर्फबाट भने २२ कात्तिकमा थुनछेक बहस सकिएको थियो।</p>
<p>२६ असोज २०७६ मा जिल्ला प्रहरी कार्यालय रौतहटले आलमलाई पक्राउ गरेको हो।</p>
<p>आलमसहित ११ जनाविरुद्ध १८ कात्तिकमा रौतहट जिल्ला अदालतमा कर्तव्य ज्यान, ज्यान मार्ने उद्योग र विस्फोटक पदार्थको प्रयोग तथा भण्डारको अभियोगमा मुद्दा दायर भएको छ।</p>
<p>२७ चैत २०६४ मा भएको बम विष्फोटका घाइतेलाई इँटाभट्टामा हालेर जिउँदै जलाएको अभियोग आलममाथि लागेको छ।</p>
<p><strong>पढ्नुहाेस्ः</strong></p>
<p><strong><a href="https://dekhapadhi.com/news/2175" target="_blank">बारका पूर्वअध्यक्ष खड्काले भने- ‘सिंगो राज्य लागेर आलमलाई फसाउन खोज्यो’ </a></strong></p>
<p><strong><a href="https://dekhapadhi.com/news/2128" target="_blank">आलमका वकील शेरबहादुर केसीले भने- ‘मिडिया ट्रायल गरेर झुटो मुद्दामा फसाइयो’</a></strong></p>
<p><strong><a href="https://dekhapadhi.com/news/2100" target="_blank">रौतहट सामूहिक हत्याकाण्ड : अभियुक्त अफताब आलम पक्षका वकिलले बहस गर्दै </a></strong></p>
प्रतिक्रिया दिनुहोस्
.jpg)
