वायु प्रदूषणका कारण तेहरानका विद्यालय बन्द
<p> इरान। इरानको राजधानी तेहरानका विद्यालयहरू बन्द गर्न आज निर्देशन दिइएको छ।</p>
<p>वायु प्रदूषणको अवस्था उच्च भएपछि त्यसले असर पार्ने भएकाले विद्यालयहरू बन्द गर्न निर्देशन दिइएको अधिकारीहरूले जनाएका छन्।</p>
<p>गभर्नर अनौशिराभन मोहसेनी बान्डपीले पूर्वविद्यालय (किन्नर गार्डन), पूर्व प्राथमिक र प्राथमिक विद्यालयहरू बन्द गर्न निर्देशन दिइएको बताए। </p>
<p>उनका अनुसार राजधानी तेहरानसँगै घार्चक, पिश्भा र वारामिनलगायतका शहरका विद्यालयहरू पनि बन्द भएका छन्।</p>
<p>“तेहरानको वायुको गुणस्तर मापन सूचकाङ्क संवेदनशील समूहका लागि खतरा अवस्थामा पुगेको पाइएको छ,” अर्का एक अधिकारीले भने।</p>
<p>बालबालिका, गर्भवती महिला, वृद्धवृद्धा र रोगी मानिसलाई यस्तो प्रदूषणले बढी असर गर्ने भएकाले सकेसम्म घर बाहिर कम मात्रै निस्कन विज्ञहरूले सुझाव दिएका छन्।</p>
<p>प्रदूषणका कारण उत्पन्न बाक्लो हुस्सुले तेहरानलाई हिजाे ढाकेपछि आज बिहानैदेखि निकै काम मात्र विद्यालय बस सञ्चालन भएका थिए।</p>
<p>इरानमा प्रदूषणकै कारण उत्पन्न अनेक समस्या र रोग लागेर हरेक वर्ष ३० हजार इरानी नागरिकको मृत्यु हुने गरेको स्वास्थ्य अधिकारीहरूले जनाएका छन्।</p>
<p>हरेक वर्षको हिउँदयाममा तेहरानमा प्रदूषणका कारण उत्पन्न हुने असरहरू बढी देखिने गरेको पाइएको छ। <em>(रासस-एएफपी)</em></p>
प्रतिक्रिया दिनुहोस्
.jpg)
