उपचारका लागि विदेश जान सरिफलाई पाकिस्तानी सरकारको अनुमति
<p>पाकिस्तान। पाकिस्तानका पूर्वप्रधानमन्त्री नवाज सरिफलाई उपचारका लागि विदेश जान पाकिस्तानी सरकारले आज अनुमति दिने निर्णय गरेको छ।</p>
<p>उनको स्वास्थ्य अवस्थालाई ध्यानमा राखेर उनलाई उपचारका लागि विदेश जान अनुमति दिने निर्णय गरिएको एक मन्त्रीले जानकारी दिएका छन्।</p>
<p>पाकिस्तानको तीन पटक प्रधानमन्त्री भइसकेका सरिफ भ्रष्टाचारसम्बन्धी मुद्दामा दोषी ठहरिँदै जेल सजाय भाेगिरहेका छन्। </p>
<p>कारागारमै रहेका बेला गम्भीर बिरामी भएको विवरण सार्वजनिक भएपछि पाकिस्तानको एक अदालतले केही दिन अगाडि उनलाई कारागारबाट बाहिर निकालेर अस्पताल लगेर उपचार गराउन आदेश दिएको थियो।</p>
<p>अदालतको आदेशपछि उनलाई केही दिन अस्पतालमा राखेर उपचार गराइएको थियो भने त्यसपछि अति सघन कक्ष (आईसीयू) र चिकित्सकहरूको टोली उनकै निवासमा व्यवस्था गरिएको थियो।</p>
<p>स्वदेशमा गरिएको उपचार पर्याप्त नभएको ठहर गरेर उनलाई थप उपचारका लागि लण्डन लैजाने तयारी भइरहेका बेला उनलाई सरकारले लण्डन जान अनुमति दिएको हो।</p>
<p>उनलाई उपचारका लागि विदेश बस्न चार हप्ताको समय तोकिएको एक मन्त्रीले पत्रकारहरूलाई जानकारी दिएका छन्। <em>(रासस/सिन्ह्वा)</em></p>
प्रतिक्रिया दिनुहोस्
.jpg)
