समयमा निर्माण नभएका २५ ठूला आयोजनाहरूको सतर्कता केन्द्रले अनुसन्धान गर्ने
<p>काठमाडौं। समयमा निर्माण नभएका र हरेक वर्ष निर्माण खर्च बढाउँदै लगेका २५ ठूला आयोजनाको प्राविधिक परीक्षण गरिने भएको छ।</p>
<p>राष्ट्रिय सतर्कता केन्द्रले बाहिरबाट विज्ञ तथा विषयगत प्राविधिक टोली निर्माण गरी राष्ट्रिय गौरव र सार्वजनिक चासोका ती आयोजनाहरूको प्राविधिक परीक्षण गर्न लागेको हो। </p>
<p>आयोजना निर्माण शुरू हुने बेलाको लागतमा आयोजना सम्पन्न नहुने र गुणस्तरसमेत कायम नभएको देखिएपछि सतर्कताले विज्ञ टोली नै बनाएर ठूला आयोजनामा परीक्षणको तयारी थालेको छ।</p>
<p>केन्द्रबाट खटाइएका टोली सम्बन्धित आयोजनामा आवश्यकता अनुसार तीनदेखि चार महीना बस्नेछन्।</p>
<p>उनीहरूले चैत २०७६ भित्रै रिपोर्ट बुझाउनुपर्ने केन्द्रका प्रवक्ता तथा सूचना अधिकारी डालानाथ अधिकारीले जानकारी दिए। </p>
<p>टोलीले परीक्षण गर्ने २५ ठूला आयोजनामा राष्ट्रिय गौरवका २२ मध्ये १७ आयोजना रहेका छन् भने राष्ट्रिय महत्वका आठ छन्।</p>
<p>सतर्कता केन्द्रले प्राविधिक परीक्षण गर्न लागेका आयोजनामा दुई वटा पुल छन्। रेलमार्गअन्तरर्गत महोत्तरी र हुलाकी राजमार्गअन्तर्गत कैलालीको पुल रहेको छ।</p>
<p>सडकतर्फ हुलाकी राजमार्गको बाँके–संग्रामपुर खण्ड र कर्णाली राजमार्गअन्तर्गत हिल्सा सिमिकोट परियोजना रहेको छ।</p>
<p>यसैगरी कालीगण्डकी करिडोरभित्र रहेको पाल्पाको आँधीखोला बाटो, कोशी करिडोरअन्तर्गत उत्तर–दक्षिण खाँदबारी संखुवासभा छ्याङ्कुटी खण्डमा प्राविधिक परीक्षण गरिनेछ। </p>
<p>आजको <em>नागरिक दैनिक</em>को समाचार अनुसार अन्य सडक, विद्युत, खानेपानी आयोजनाहरू पनि अनुसन्धानको सूचीमा राखिएको छ।</p>
प्रतिक्रिया दिनुहोस्
.jpg)
