निजामती कर्मचारीको सेवा अवधि अब ६० वर्ष
<p>काठमाडौं। निजामती कर्मचारीहरूको सेवा अवधि ६० वर्ष कायम हुने भएको छ।</p>
<p>संघीय संसदको राज्य व्यवस्था तथा सुशासन समितिको आज सिंहदरबारमा बसेको बैठकले निजामती सेवाको कर्मचारीको सेवा अवधिको उमेर हद पनि ६० वर्ष पुर्‍याउने निर्णय गरेको हो।</p>
<p>निजामती सेवाको कर्मचारीहरूको पनि अवकाश अवधि स्वास्थ्य सेवाका कर्मचारी सरह नै ६० वर्ष पुर्‍याउने निर्णय गरिएको समितिका उपसचिव संजय दाहालले जानकारी दिए।</p>
<p>तर, त्यो हरेक वर्ष ६/६ महिनामा थप गरेर ६० वर्ष पुर्‍याइनेछ।</p>
<p>पदपूर्तिलगायतमा असर नहुने गरी यसको उमेर हद ६/६ महिना थप गरेर ६० वर्ष पुर्‍याउने निर्णय गर्नुपरेको पनि उपसचिव दाहालले बताए।</p>
<p>समितिको बैठकमा ‘संघीय निजामती सेवाको गठन, सञ्चालन र सेवाको शर्त सम्बन्धमा व्यवस्था गर्न बनेको विधेयकको मस्यौदा प्रतिवेदन’माथि आज पनि छलफल गरिएको थियो।</p>
<p>बैठकले कार्य क्षमता र दुर्गम क्षेत्रमा काम गर्ने कर्मचारीलाई बढुवाका लागि बढी नम्बर दिने सहमति पनि गरेको छ।</p>
प्रतिक्रिया दिनुहोस्
.jpg)
