नेकपा पतन हुँदैछः डा. भट्टराई
<p>काठमाडौं। समाजवादी पार्टीका संघीय परिषद् अध्यक्ष डा. बाबुराम भट्टराईले नेपाल कम्युनिष्ट पार्टी (नेकपा) भविष्यमा उठ्नै नसक्ने गरी पतन हुने दाबी गरेका छन्।</p>
<p>पूर्वप्रधानमन्त्री समेत रहेका भट्टराईले सत्तारुढ नेकपा दार्शनिक, वैचारिकरूपमा अन्योलग्रस्त र नैतिकरूपमा स्खलित भइसकेको बताए।</p>
<p>आज काठमाडौंमा आयोजित संघीय परिषद् बैठकमा आफ्नो राजनीतिक प्रतिवेदन पेश गर्दै नेकपाका ठूल्ठूला नेताहरूको भ्रष्टाचार तथा नैतिक पतनका घटना लज्जाजनक ढंगले उदांगिँदै आएको पनि उल्लेख गरे।</p>
<p>भट्टराईले सरकारमा पार्टीको संलग्नताबारे गम्भीर समीक्षा गर्नुपर्ने प्रस्ताव पनि गरेका थिए।</p>
<p>उनले महत्त्वपूर्ण निर्णय लिँदा सत्ता साझेदार आफ्नो दलसँग सामान्य सरसल्लाहसमेत नगरेकोमा असन्तुष्टि जनाए। “अब पनि संविधान संशोधन गर्न शर्त पालना नभए सरकारबाट बाहिरिनुपर्ने अवस्था आउँछ,” उनले भने।</p>
<p>संविधान संशोधनका लागि सत्तारुढ नेकपासँग पुनः पहल गर्ने भट्टराईको भनाइ छ।</p>
<p>त्यसको प्रक्रिया अघि बढाउन नचाहेमा सरकारबाट बाहिरिनका लागि पार्टीको कार्यकारिणी समितिले निर्णय गर्ने गरी पार्टी अगाडि बढ्नुपर्ने उनले धारणा राखे।</p>
प्रतिक्रिया दिनुहोस्
.jpg)
