१५ दिनभित्र स्थायी राजधानी र प्रदेश नामकरणः मुख्यमन्त्री पौडेल
<p>हेटाैंडा। प्रदेश ३ का मुख्यमन्त्री डोरमणि पौडेलले ३ नम्बर प्रदेशको स्थायी राजधानी र नामकरण १५ दिनभित्र टुङ्गिने दाबी गरेका छन्।</p>
<p>आन्तरिक राजश्व विभाग र सिस्नुपानी नेपालद्वारा आज हेटौंडामा आयोजित करमैत्री यात्रा हास्यब्यङ्ग्य मनोरञ्जन कार्यक्रमको उद्घाटन गर्दै मुख्यमन्त्री पौडेलले “राजधानी र नामकरणको विषयको चर्चा धेरै भयो, अबको १५ दिनभित्र टुङ्ग्याउँछु”, भने।</p>
<p>कर तिर्नु सबैको दायित्व हो भन्दै जनताले कर तिरेर सरकारको कामलाई सहयोग गर्नुपर्नेमा उनले आग्रह गरे। </p>
<p>“देश ऋण र अनुदानबाट होइन, जनताले मेहनत गरेर बुझाएको करबाट राज्य सञ्चालन हुनुपर्छ”, मुख्यमन्त्री पौडेलले भने, “कर तिर्ने पद्धतिको विकास गर्नुपर्छ। जनताले तिरेको कर सदुपयोग भएको छ कि छैन, त्यो जनताको अधिकार हो, त्यसमा सजग र सतर्क हुनुपर्छ।”</p>
<p>सिस्नुपानी नेपालले सरकारको करमैत्री कार्यक्रममार्फत् सहयोग गरेको काम सराहनीय भएकोमा मुख्यमन्त्री पौडेलले प्रशंसा गरे।</p>
<p>आन्तरिक राजश्व कार्यालय हेटौंडाका प्रमुख सन्तबहादुर ढकालको सभाध्यक्षतामा भएको सो कार्यक्रममा कलाकार मनोज गजुरेल, धीरेन्द्र प्रेमर्षिलगायतले कर तिर्ने सम्बन्धमा मनोजञ्जनात्मक प्रस्तुति दिएका थिए। <em>रासस</em></p>
प्रतिक्रिया दिनुहोस्
.jpg)
