चोरीका गाडीसहित आदित्य ट्रान्सपोर्टका दुई जना सञ्चालक पक्राउ
<p>काठमाडौं। भारतबाट चोरी गरेर ल्याइएको तीनवटा गाडीसहित कलंकीबाट दुई जना पक्राउ परेका छन्। </p>
<p>पक्राउ पर्नेहरुमा काठमाडौंको तारकेश्वर नगरपालिकास्थित गोल बस्ने गोरखाका मुकुन्दप्रसाद पुडासैनी र सुर्खेतका दीपक बुढा छन्। </p>
<p>उनीहरुबाट बा २१ च ८७१४ र बा १८ च ३१३८ नम्बरको स्कर्पियो तथा बा ११ च ९७९४ नम्बरको निजी कार बरामद गरिएको महानगरीय प्रहरी वृत्त कालिमाटीका प्रहरी नायब उपरीक्षक रुगम कुँवरले बताए।</p>
<p>उनीहरु काठमाडौं नयाँबजारस्थित आदित्य ट्रान्सपोर्टका सञ्‍चालक रहेको अनुसन्धानमा खुलेको छ। </p>
<p>उक्त ट्रान्सपोर्टले चोरीको गाडी प्रयोग गरिरहेको सूचनाको आधारमा कालिमाटीबाट खटिएको टोलीले गए राति गाडीसहित उनीहरु पक्राउ परेका हुन्।</p>
<p>घटनाको विषयमा थप अनुसन्धान भइरहेको प्रहरीले जनाएको छ। उनीहरुलाई थप कारवाहीका लागि राजश्व अनुसन्धान विभाग ललितपुर पठाइने प्रहरीले जनाएको छ।</p>
प्रतिक्रिया दिनुहोस्
.jpg)
