क्यालिफोर्नियामा विद्यालयभित्र गोली प्रहार, दुई विद्यार्थीको मृत्यु
<p>क्यालिफाेर्निया। संयुक्तराज्य अमेरिकाको क्यालिफोर्निया राज्यस्थित एक विद्यालयका १६ वर्षे छात्रले स्कुलभित्रै गोली चलाउँदा दुई विद्यार्थीको मृत्यु भएको छ।</p>
<p>उक्त गोलीकाण्डमा अरू तीनजना विद्यार्थी पनि घाइते भएका छन्।</p>
<p>साथीहरूमाथि पेस्तोल प्रहार गरेपछि आत्महत्या गर्न आफैंमाथि गोली चलाएका ती किशोरलाई प्रहरीले गम्भीर अवस्थामा गिरफ्तार गरेको छ।</p>
<p>ती विद्यार्थीको स्वास्थ्य अवस्था अत्यन्त नाजूक रहेको प्रहरीले जनाएको छ।</p>
<p>सान्टा क्लारिटाको सघस माध्यमिक विद्यालयमा गोली चलेको आवाज आएलगत्तै प्रहरी घटनास्थल पुगेको थियो।</p>
<p>विगत दुई दशकमा अमेरिकी स्कुलहरूमा भएका “मास सुटिङ” मा ३०० भन्दा बढी विद्यार्थी र किशोर किशोरीको मृत्यु भइसकेको छ।</p>
<p>अमेरिकी संसदमा सर्वसाधारणलाई बन्दुक राख्न दिने कानुनमा कडाई गर्न लामो समयदेखि बहस जारी छ। तर, अमेरिकाका मुख्य दुई दल रिपब्लिकन पार्टी र डेमोक्र्याटिक पार्टीबीच सहमति हुन सकेको छैन।</p>
<p>रिपब्लिकन पार्टीबाट प्रतिनिधित्व गर्ने राष्ट्रपति डोनाल्ड ट्रम्प पनि बन्दुकमाथि धेरै कडाई गर्न नहुने पक्षमा छन्, तर डेमोक्र्याट पार्टी कडा नियमको पक्षमा छ।</p>
<p>प्रहरी अधिकृत केन्ट वेगेनरले एशियाली मूलका एक किशोरले आफ्नो झोलाबाट बन्दुक झिकेर साथीहरूमाथि अन्धाधुन्ध गोली चलाएको र अन्त्यमा आत्महत्या गर्ने मनशायले आफैंलाई गोली हानेको जानकारी दिए।</p>
<p>स्कुलमा गोली चलाउनुपर्ने कारणबारे केही खुलेको छैन ।</p>
<p>मृत्यु हुनेहरुमा १६ वर्षकी एक किशोरी र १४ वर्षका बालक रहेका छन्।</p>
<p>घाइते हुनेहरूमा एकजना १४ वर्षीय बालक र दुईजना १५ वर्षका बालिका छन्।</p>
<p>यस विद्यालयमा करीब दुई हजार ३०० विद्यार्थी अध्ययनरत छन्।</p>
<p>अमेरिकी राष्ट्रपति, सभामुख, सिनेटरहरु तथा क्यालिफोर्नियाका गभर्नर समेतले पछिल्लो घटनाबाट आफूहरू अत्यन्त दुःखी भएको बताएका छन्। <em>(रासस-एएफपी)</em></p>
प्रतिक्रिया दिनुहोस्
.jpg)
