नेपाल भ्रमण वर्ष शुभारम्भको तयारी गर्दै कर्णाली
<p>काठमाडाैं। कर्णाली प्रदेश सरकारले ‘नेपाल भ्रमण वर्ष–२०२०’ शुभारम्भको तयारी थालेको छ।</p>
<p>नेपाल सरकारले ‘नेपाल भ्रमण वर्ष–२०२०’ सफल पार्न थालेको तयारीसँगै कर्णाली प्रदेश सरकार उद्योग, पर्यटन, वन तथा वातावरण मन्त्रालयले शुभारम्भको तयारीलाई तीव्रता दिएको हो।</p>
<p>यसका लागि कर्णाली प्रदेश सरकारको मन्त्रिपरिषद् बैठकले मुख्यमन्त्री महेन्द्रबहादुर शाही संरक्षक र पर्यटनमन्त्री नन्दसिंह बुढा अध्यक्ष रहने गरी ३१ सदस्यीय ‘कर्णाली प्रदेशस्तरीय पर्यटन प्रवर्द्धन समिति’ गठन गरिसकेको छ।</p>
<p>भ्रमण वर्षलाई स्वागतयोग्य, सफल र सुखद् बनाउन पाहुनालाई दिन सकिने सेवा तथा छुट सुविधाका लागि होटल तथा यातायात व्यवसायीसँग छलफल गर्ने कार्यक्रम रहेको उद्योग, पर्यटन, वन तथा वातावरणमन्त्री बुढाले जानकारी दिए।</p>
<p>“यसका लागि ३ मंसीरमा सर्वपक्षीय बैठक आह्वान गरिएको छ”, मन्त्री बुढाले भने, “त्यसले भ्रमण वर्ष शुभारम्भ दिनलाई भव्य बनाउन सहयोग पुग्ने छ।”</p>
<p>संरचना निर्माण, प्रदेशको नीतिगत सुधार र १ जनवरी २०२० मा नेपाल भ्रमण वर्षको शुभारम्भ दिनको महत्त्व बढाउन यस अघि छलफल भएको र यसलाई मूर्तरुप दिन पुनः सरोकारवालासँग छलफल गरिने उनले बताए। <em>रासस</em></p>
प्रतिक्रिया दिनुहोस्
.jpg)
