सकियाे रेन्जर सम्मेलन, पर्यटनमन्त्रीले पठाए नेपाल भ्रमणकाे निम्ताे
<p>चितवन। संस्कृति, पर्यटन तथा नागरिक उड्डयनमन्त्री योगेशकुमार भट्टराईले संरक्षण क्षेत्रमा लागेका ७१ देशका प्रतिनिधिलाई नेपालमा मनाउन लागिएको भ्रमण वर्षको निम्तो आफ्नो देशमा पुर्‍याइदिन आग्रह गरेका छन्। </p>
<p>नवौं विश्व रेन्जर सम्मेलनको आज सौराहामा समापन गर्दै उनले आफ्ना परिवार, इष्टमित्र र साथीभाइलाई भ्रमण वर्षको निम्तो पुर्‍याइदिन उनले आग्रह गरेका हुन्।</p>
<p>नेपाल जैविक, प्राकृतिक र सांस्कृतिक दृष्टिले असाध्यै धनी देश भएको सम्मेलनका क्रममा सहभागीले जानकारी पाएकोमा आफू विश्वस्त भएको मन्त्री भट्टराईकाे भनाइ थियाे।</p>
<p>सो अवसरमा अन्तर्राष्ट्रिय रेन्जर महासंघ (आईआरएफ) का नवनियुक्त अध्यक्ष क्रिश गिल्सले सम्मेलनमा भएका छलफल र निचोडलाई आत्मसात् गर्दै महासंघलाई अघि बढाउने प्रतिबद्धता व्यक्त गरे।</p>
<p>राष्ट्रिय निकुञ्ज तथा वन्यजन्तु संरक्षण विभागका सहायक संरक्षण अधिकृत विष्णु थपलियाका अनुसार दक्षिण अफ्रिकाका गिल्सको नेतृत्वमा १३ सदस्यीय नयाँ समिति गठन भएको छ।</p>
<p>आउँदो सम्मेलनका लागि पोर्चुगल र पेरुले प्रस्ताव गरेका छन्।</p>
<p>नयाँ कार्यसमितिले ती दुई देशलाई सन् २०२२ र २०२५ का लागि छनोट गरी निर्णय गर्ने थपलियाले जानकारी दिए।</p>
<p>सम्मेलनले चोरी शिकार तथा अवैध व्यापार नियन्त्रणमा विश्वभर सहकार्य गरेर पृथ्वीको उपहार वन्यजन्तु भावि पुस्ताका लागि संरक्षण गर्न जरुरी भएको भन्दै चितवन घोषणा पत्र २०१९ जारी गरेको छ।</p>
<p>थपलियाका अनुसार घोषणा पत्रमा रेन्जरका हकहित, रेन्जर र समुदायबीचको सम्बन्ध, संरक्षणमा आदिवासी रैथाने समुदायको भूमिका, रेन्जरको क्षमता विकास, संरक्षणमा प्रविधि, महिला रेन्जरको भूमिका र भावी दिनमा रेन्जरले गर्नुपर्ने कार्य समावेश गरिएको घोषणापत्र जारी भएको छ।</p>
प्रतिक्रिया दिनुहोस्
.jpg)
