विद्युत् प्राधिकरण अत्तरियाले ३३ करोड बढी बक्याैता उठाउन बाँकी
<p>कैलाली। नेपाल विद्युत् प्राधिकरण प्रादेशिक कार्यालय अत्तरियाले ३३ करोड रूपैयाँभन्दा बढी विद्युत् महसुल उठाउन बाँकी छ।</p>
<p>कार्यालयले दिएको जानकारीअनुसार गत आर्थिक वर्ष २०७५/०७६ सम्मको मात्रै ३३ करोड सात लाख महसुल उठाउन बाँकी रहेको हो।</p>
<p>प्रदेशमा सडक बत्तीबापत् ९ करोड ४८ लाख २० हजार, गैरव्यापारिक एक करोड ६८ लाख २२ हजार, कालोसूचीमा राखिएका ग्राहकबाट एक करोड ३८ लाख ४७ हजार र अन्य ग्राहकबाट २० करोड ५२ लाख १० हजार गरी ३३ करोड सात लाख रूपैयाँ महसुल उठाउन बाँकी रहेको प्राधिकरणले जनाएको छ।</p>
<p>उक्त बक्यौता रकम कार्यालय मातहतका ११ वटा वितरण केन्द्रको नाममा देखिएको जनाइएको छ।</p>
<p>वितरण केन्द्रका नाममा ठूलो रकम बक्यौता देखिएपछि अत्तरियाका प्रमुख शतीशकुमार कर्णले सम्बन्धित ग्राहकको लाइन काट्न केन्द्रका प्रमुखहरूलाई निर्देशन दिएको बताए।</p>
<p>महसुल नतिर्ने ग्राहकको लाइन काट्न केन्द्र प्रमुखहरूलाई निर्देशन दिइसकिएकाले बक्यौता रकम सङ्कलन हुने अपेक्षा लिइएको उनको भनाइ छ।</p>
<p>सुदूरपश्चिम प्रदेशका ९ वटै जिल्ला प्राधिकरणको ३३ केभी राष्ट्रिय प्रसारण लाइनमा जोडिएका छन्।</p>
<p>यससँगै १२ वटा विद्युत् वितरण केन्द्र स्थापना गरिएको प्रादेशिक कार्यालय अत्तरियाका प्रमुख कर्णको भनाइ छ। <em>रासस</em></p>
प्रतिक्रिया दिनुहोस्
.jpg)
