नेकपा अध्यक्ष दाहालले भने– ‘सरकार र पार्टीविरूद्ध चाैतर्फी घेराबन्दी भयाे’
<p>काठमाडौं। नेपाल कम्युनिष्ट पार्टी (नेकपा) अध्यक्ष पुष्पकमल दाहालले अहिले पार्टी र सरकारका विरुद्ध चारैतिरबाट घेराबन्दी भएको बताएका छन्।</p>
<p>राष्ट्रिय युवा संघ नेपालको एकता भेलालाई सम्बोधन गर्दै दाहालले आफूहरूमाथि चारैतिरबाट घेराबन्दी भएको बताएका हुन्।</p>
<p>“अहिले विश्व हाम्रो हातमा छैन, अरूकै हातमा छ,” दाहालले भने, “संसारले कम्युनिष्टहरू अगाडि नबढुन्, पछाडि फर्किउन् भन्ने चाहन्छ। हामीभित्र तोडफोड गराउने, भ्रम सिर्जना गराउने र अहंकार पैदा गर्न अनेक हतकण्डा अपनाइरहेका छन्।”</p>
<p>त्यसलाई परास्त गर्न युवाको शक्ति, चेतना, सक्रियता र पहलकदमी आवश्यक रहेको उनले बताए ।</p>
<p>गठबन्धन हुँदादेखि नै आफूहरूमाथि षड्यन्त्र भइरहेको उनको भनाइ छ।</p>
<p>नेकपा अध्यक्ष दाहालले नेकपाको एकता प्रक्रिया नेपालको इतिहासमा कम्युनिष्ट आन्दोलनलाई नयाँ उचाइमा पु¥याउने असाधारण पहल भएको बताए।</p>
<p>“यो एकता राष्ट्रपति, प्रधानमन्त्री बन्नलाई गरेको हो कि भन्ने तल्लो स्तरको टिप्पणी गरिएका छन्,” दाहालले भने, “तर, यो त्यागको एउटा उदाहरण हो।”</p>
<p>नेकपाको लिखित दस्तावेजमा तत्कालीन माओवादीको २१ औं शताबन्दीको जनवाद र तत्कालीन एमालेको जनताको बहुदलीय जनवाद समेटिएको र यी दुवै विचारलाई विकसित र परिमार्जन गरेर ‘समाजवादोन्मुख जनताको जनवाद’ भनिएको उनले स्पष्ट पारे।</p>
<p>“कसैलाई मदन भण्डारीलाई इन्कार गरिएको हो कि र कसैलाई २१ औं शताब्दीको जनवादलाई अस्वीकार गरिएको हो कि भन्ने लागेको हुन सक्छ,” दाहालले थपे, “तर त्यसो होइन, जनताको बहुदलीय जनवाद, मदन भण्डारीको योगदान, माओवादीको योगदानसमेतलाई गम्भीर समीक्षा गरेर परिमार्जन र विकास गरिएको हो।”</p>
<p>यस्तै अहिलेको उपनिर्वाचनलाई उनले सानो अग्निपरीक्षा भएको बताएका छन्। “हाम्रो लोकप्रियता घटेको छैन, बढेको छ भनेर देखाउनुपर्नेछ,” उनी भन्छन्, “हामीले पहिले नजितेका क्षेत्रमा हामीले जित्यौं भने हामीमाथि लगाइएका सबै आरोपहरू खारेज हुनेछन्।”</p>
प्रतिक्रिया दिनुहोस्
.jpg)
