अफ्रिकी मुलुक बुर्किना फासोमा ३२ आतंककारी मारिए
<p>ओगाडुगा। अफ्रिकी मुलुक बुर्किना फासोको सेनाले मुलुकको उत्तरमा सञ्चालन गरेको एक सैन्य कारबाहीमा कम्तीमा ३२ जना आतङ्ककारीको मृत्यु भएको जनाएको छ।</p>
<p>आतंककारी समूहले गस्तीमा रहेको सैन्य टोलीमाथि आक्रमण गरेपछि सेनाले प्रतिकारबाही गरेको थियो।</p>
<p>यस कारबाहीका क्रममा एकजना सिपाहीको पनि मृत्यु भएको छ।</p>
<p>एक महिनाअघि मात्र एक क्यानाडेली खानी कम्पनीका मजदुर बोकेको सवारी साधनलाई लक्षित गरी आतंककारीले गरेको आक्रमणमा ३७ जना सर्वसाधारणको ज्यान गएको थियो।</p>
<p>सेनाले चलाएको कारबाहीका क्रममा लोरुमस्थित योरसालाबाट यौनदासीका रूपमा बन्धक बनाएर राखिएका केही महिलाको उद्धार गरिएको छ।</p>
<p>विद्रोहीबाट सेनाले हातहतियार र अरु युद्ध सामग्री पनि बरामद गरेको थियो।</p>
<p>गरिबीको चपेटामा पिल्सिएको बुर्किना फासोमा सन् २०१५ यता शुरु भएको अतिवादी जिहादी आक्रमणबाट सात सयभन्दा बढीको मृत्यु भइसकेको छ।</p>
<p>गाउँगाउँमा शुरु भएको हिंसाका कारण पाँच लाखभन्दा बढी मानिस अन्यत्र पलायन भएका छन्।</p>
<p>यी आक्रमणको जिम्मेवारी अल–कायदा र इस्लामिक स्टेट समेतका अनेक समूहले लिने गरेका छन्।</p>
<p>मुलुकको कमजोर हातहतियार र तालिमप्राप्त सुरक्षाफौजको फाइदा उठाएर हिंसात्मक कारबाहीहरू वर्षैपिच्छे बढ्दै गएका छन्, र सन् २०१९ यता यो अझ बढेको छ।</p>
<p>बुर्किना फासोका छिमेकी मुलुकहरू माली र नाइजर समेतमा फैलिएको यस हिंसात्मक कारबाही रोक्न अफ्रिकी सेनाका साथै फ्रेन्च र अमेरिकी सैनिक तैनाथ गरिए पनि सफलता हासिल हुन सकेको छैन। <em>(रासस/एएफपी)</em></p>
प्रतिक्रिया दिनुहोस्
.jpg)
