केचनाकलन घुम्न आएका पाँच युक्रेनी भारतीय सुरक्षाकर्मीद्वारा पक्राउ
<p>भद्रपुर। नेपालको सबैभन्दा होचो स्थान केचनाकलन घुम्न आएका पाँच जना युक्रेनी नागरिकलाई भारतीय सुरक्षा बल (एसएसबी) ले पक्राउ गरेको छ। </p>
<p>खुला सिमानाको पत्तो नपाएर भारतीय भू-भागमा पुगेका उनीहरुलाई बिहारको किसनगञ्ज क्षेत्रबाट पक्राउ गरिएको जिल्ला प्रहरी कार्यालय, झापाले जनाएको छ। </p>
<p>कादोगाउँमा रहेका एसएसबीका जवानले उनीहरुलाई नियन्त्रणमा लिएको जिल्ला प्रहरी कार्यालय, झापाका प्रवक्ता महेन्द्रकुमार श्रेष्ठले बताए।</p>
<p>पक्राउ पर्नेमा मारियाना रुडिक, भ्लादिमीर कोवालचक, लिलिया कोवालचक, अलेक्जेन्डर काप्टजेन र इवान सिक छन्।</p>
<p>झापाको केचनाकलन गाउँपालिकामा भारतीय सिमाना नजिक नेपालकै होचो स्थान केचनास्तम्भ छ। </p>
<p>प्रहरीका अनुसार सो स्थानमा घुम्ने क्रममा युक्रेनी नागरिक सिमाना नचिनेर २९ कात्तिकमा अलमलिँदै एक सय मिटर टाढा भारतीय भूमि कादोगाउँ पुगेका थिए।</p>
<p>झुक्किएर सीमापारि पुगेकाले उनीहरुलाई छाडिदिन नेपाली सुरक्षा निकायले भारतीय सुरक्षाकर्मीसँग आग्रह गरेको छ। <em>रासस</em></p>
प्रतिक्रिया दिनुहोस्
.jpg)
