ज्यान मार्ने उद्योगमा फरार तरुण दल बाँकेका कोषाध्यक्ष पक्राउ
<p>काठमाडौं। महानगरीय अपराध महाशाखाको टोलीले ज्यान मार्ने उद्योगमा फरार तरुण दल बाँकेका कोषाध्यक्ष केशर खड्कालाई पक्राउ गरेको छ।</p>
<p>टोलीले आज अपरान्ह ४ बजे उनलाई काठमाडौंबाट पक्राउ गरिएको अपराध महाशाखाका प्रमुख एसएसपी सहकुल थापाले जानकारी दिए।</p>
<p>उनीविरुद्ध जिल्ला अदालत बाँकेमा ज्यान मार्ने उद्योगमा मुद्दा दायर भएको थियो।</p>
<p>मुद्दा दायर भएपछि उनी फरार थिए।</p>
<p>जिल्ला प्रहरी कार्यालय बाँकेले उनी फरार भएपछि महानगरीय अपराध महाशाखालाई पक्राउ गरिदिन अनुमति दिएको थियो।</p>
<p>२६ असोज २०७६ मा बाँकेको बैजनाथ गाउँपालिका-३ मा लागेको मेलामा केशर खड्का नेतृत्वको समूहले मेला संयोजक लोकेन्द्र शाहीलाई खुकुरी प्रहार गरेर आक्रमण गरेकाे थियाे।</p>
<p>आक्रमण लगत्तै खड्का फरार थिए।</p>
<p>प्रहरीले घटना लगत्तै घटनामा संलग्न तेजु रोकाया, यमबहादुर राना, पुस्कर राना, विष्णु रोकाया र सुरेश रानालाई पक्राउ गरेको थियो।</p>
<p>उनीहरूविरुद्द जिल्ला अदालत बाँकेमा ज्यान मार्ने उद्योगमा मुद्दा दायर भएको थियो।</p>
<p>अदालतले यमबहादुर रानालाई पुर्पक्षका लागि थुनामा पठाउने आदेश गर्‍याे भने बाँकीलाई धरौटीमा रिहा गरेको थियो।</p>
<p>ज्यान मार्ने उद्योगमा प्रतिवादी बनाइएका केशर खड्कालाई फरार सूचीमा राखिएको थियो।</p>
<p>महाशाखाको टोलीले इलाका प्रहरी कार्यालय कोहलपुरको जिम्मा लगाएपछि उनलाई अदालतमा उपस्थित गराइने कोहलपुरका डीएसपी हेमबहादुर शाहीले जानकारी दिए।</p>
प्रतिक्रिया दिनुहोस्
.jpg)
