जनतालाई अधिकार सम्पन्न बनाउन राज्य बलियो हुनुपर्छः मुख्यमन्त्री पोखरेल
<p>रूकुम पूर्व। प्रदेश ५ का मुख्यमन्त्री शंकर पोखरेलले जनतालाई अधिकार सम्पन्न बनाउन राज्य बलियो हुनुपर्ने बताएका छन्।</p>
<p>प्रदेश सरकार सधैँ नागरिकको हकहितको पक्षमा रहेको पाेखरेलले बताए।</p>
<p>मौलिक कला, परम्परा र संस्कृतिले भरिएको रुकुम पूर्वको पुथाउत्तरगङ्गा गाउँपालिकास्थित तकसेरामा आयोजना गरिएको जनसभालाई सम्बोधन गर्दै उनले यस्तो बताएका हुन्।</p>
<p>उनले प्रदेशलाई सम्पन्न बनाउनका लागि प्रदेश सरकारले व्यवस्थित योजना बनाएर अगाडि बढिरहेको जानकारी गराए।</p>
<p>प्रदेश सरकारले पनि कृषिलाई नै पहिलो प्राथमिकता दिएर अगाडि बढिरहेको भन्दै मुख्यमन्त्री पाेखरेलले रुकुम पूर्वको उत्पादनले बजार नपाएको खण्डमा बजारसम्म पुर्‍याउन अनुदानको लागि प्रदेश सरकार तयार रहेको बताए।</p>
<p>संघीयता कार्यान्वयनपछिको ७७औं जिल्लाको रूपमा रहेको रुकुम पूर्वको जिल्ला सदरमुकामको टुङ्गो लागिनसकेको अवस्थामा उनले यस विषयमा मुद्दा सर्वोच्च अदालतमा विचाराधीन रहेकाले अदालतले जे फैसला गर्छ त्यो जनताले स्वीकार्नुपर्ने धारणा राखे।</p>
<p>उत्तरगंगा नदी डाईभर्सनको बारेमा पनि बोल्दै उनले रुक्मेली जनताको सहमतिबिना उक्त आयोजनाको काम अगाडि बढ्न नसक्ने बताए। </p>
<p>उत्तरगङ्गा डाईभर्सनको कुरा छलफलमै भएको हुँदा रुकुम पूर्वको हितलाई प्राथमिकतामा राखेर काम अगाडि बढाउने मुख्यमन्त्री पाेखरेलेकाे भनाइ छ। </p>
<p>यसै क्रममा उनले पुथाउत्तरगङ्गा गाउँपालिकाको तकसेरामा निर्माण गरिएको सभाहलको समेत उद्घाटन गरे। <em>रासस</em></p>
प्रतिक्रिया दिनुहोस्
.jpg)
