राजविराज रंगशालामा आगलागी ! सेनाद्वारा नियन्त्रण, घाइतेको उद्धार
<p>सप्तरी। सप्तरीको राजविराज-६ स्थित रंगशालामा अचानक आगलागी भएको छ। त्यहाँका एक-एक घर लहरै जल्न थाले, अत्तालिएका मानिसहरु भागाभाग गर्न थाले। </p>
<p>आगो निभाउने क्रममा चारजना स्थानीयवासी घाइतेसमेत भए।</p>
<p>त्यसैमध्ये एक जनाले वारुणयन्त्र र सुरक्षाकर्मीलाई फोन गरेर जानकारी गराए।</p>
<p>आगो निभाउन राजविराज नगरपालिकाको वारुणयन्त्र र घाइतेहरुको उद्घारका लागि नेपाली सेनाको राजविराजस्थित भीम दल गण विपद् युनिटको टोली आइपुग्यो। </p>
<p>घटनास्थल पुगेका सेनाको चिकित्सक टोलीले प्रारम्भिक उपचार गर्दै घाइतेहरुलाई धमाधम एम्बुलेन्समा राखे। थप उपचारका लागि एम्बुलेन्स राजविराजस्थित गजेन्द्रनारायण सिंह अस्पताल हिँड्यो। </p>
<p><img alt="" height="593" src="https://www.dekhapadhi.com/storage/photos/shares/Province/province 2/NK_Saptari-3.jpg" width="960" /></p>
<p>यो वास्तविक घटना नभई नेपाली सेनाले विपद्को समयको प्रतिकार्यका लागि गरेको सांकेतिक अभ्यास थियो।</p>
<p>रंगशालामा विभिन्न समूहले विपद्को पूर्वतयारी र विपद्का समयमा गरिनुपर्ने उद्धार र राहतको साङ्केतिक अभ्यासमार्फत स्थानीयलाई सचेत गराइएको छ। </p>
<p>राजविराज नगरपालिकाको समन्वयमा नेपाली सेनाले चार दिन सञ्चालन गरेको सामुदायिक विपद् प्रतिकार्य तालीमको अन्तिम दिन ४ मंसीरमा खेलमैदानमा तालिमप्राप्त उद्धारकर्ताले विपद्‍मा गरिने उद्धार कला प्रदर्शन गरेका हुन्।</p>
<p>प्राकृतिक विपद्को सामना पूर्व गर्नुपर्ने तयारी तथा विपद्का कारण हुने सम्भावित क्षति न्यूनीकरण गर्ने उद्देश्यले नेपाली सेनाको भीम दल गणले साङ्केतिक अभ्यास गरेको गणपति गुप्तबहादुर कुँवरले बताए।</p>
<p> कुँवरका अनुसार आगलागीका बेला राहत, उद्घार कार्य कसरी गर्ने भन्ने ज्ञान बढाउन उद्धार कला प्रदर्शन गरिएको हो।</p>
<p>अभ्यासमा आगो नियन्त्रण, घाइतेको उद्धार, उपचार र स्याहार, पीडितलाई खानपानको व्यवस्था गर्न सिकाइएको छ।</p>
<p>राजविराज नगरपालिका वारुणयन्त्र विभागका अनुसार सप्तरीमा गत आर्थिक वर्ष २०७५÷०७६ मा भएको ६७ वटा आगलागीको घटनामा करिब साढे एक करोड रुपैयाँ बराबरको क्षति भएको छ। <em>रासस</em></p>
प्रतिक्रिया दिनुहोस्
.jpg)
