एयर ट्राफिक कन्ट्रोलर सम्मेलन शुरु
<p>काठमाडौं। एयर ट्राफिक कन्ट्रोलरसम्बन्धी ३६औं एशिया प्यासिफिक क्षेत्रीय सम्मेलन आजबाट काठमाडौंमा शुरु भएको छ।</p>
<p>सम्मेलनको उद्घाटन गर्दै नेपाल नागरिक उड्डयन प्राधिकरणका महानिर्देशक राजन पोखरेलले सुरक्षित एयर ट्राफिक कन्ट्रोलको चुनौती बढ्दै गएको बताए।</p>
<p>उनले नीति र प्रविधि राम्रो भएमा एयर ट्राफिक कन्ट्रोल प्रणाली पनि सुदृढ हुने बताए।</p>
<p>संस्कृति, पर्यटन तथा नागरिक उड्डयन मन्त्रालयका सहसचिव सुरेश आचार्यले सुरक्षित र भरपर्दो एयर ट्राफिक कन्ट्रोल निर्माणका लागि संरचनाको विकास, कन्ट्रोलर क्षमता र गुणस्तरीय व्यवस्थापनका लागि सरकार सधैं तयार रहेको बताए।</p>
<p>नेपाल एयर ट्राफिक कन्ट्रोलर एशोसिएसनका अध्यक्ष रामकृष्ण भट्टले सुरक्षित एयर ट्राफिक व्यस्थापनका विषयमा समेत छलफल हुने जानकारी दिए।</p>
<p>सम्मेलनमा इन्टरनेशनल फेडेरेशन अफ एयर ट्राफिक कन्ट्रोलर एशोसिएसनमा आवद्ध एशिया प्यासिफिक क्षेत्रका १९ मुलुकका प्रतिनिधिहरू सहभागी छन्।</p>
<p>उड्डयन क्षेत्रका चुनौती र अवसरहरू, समानता, विधिकरण र नैतिकता, विकसित एयर ट्राफिक व्यवस्थापन, सूचना र सुरक्षा लगायत विभिन्न पाँचवटा अजेण्डामाथि सम्मेलनमा छलफल हुनेछ।</p>
<p>सम्मेलन ७ मंसीरसम्म चल्नेछ।</p>
प्रतिक्रिया दिनुहोस्
.jpg)
