१३औं सागमा प्याराग्लाइडिङ प्रतियोगिता नहुने
<p>पाेखरा। १५ देखि २४ मंसीरसम्म नेपालमा हुने १३औँ दक्षिण एशियाली खेलकुद(साग)मा प्याराग्लाइडिङ प्रतियोगिता नहुने भएको छ।</p>
<p>सागको नियमअनुसार प्रतियोगिता सञ्चालनका लागि न्यूनतम तीन देश सहभागी हुनुपर्छ।</p>
<p>खेलाडी दर्ताको अन्तिम दिन हिजाेसम्म नेपाल र पाकिस्तानबाहेक अन्य देशबाट खेलाडी दर्ता नहुँदा प्रतियोगिता नहुने निश्चित भएको नेपाल ओलम्पिक कमिटीका उपाध्यक्ष तेजबहादुर गुरुङले बताए।</p>
<p>एक टीममा पाँच पुरुष र महिला तीन गरी आठजना सहभागी हुनुपर्ने भए पनि पाकिस्तानबाट समेत दुईजना खेलाडी मात्र दर्ता भएका दिए।</p>
<p>गत वर्ष इण्डोनेसियामा सम्पन्न एशियन गेममा नेपालले जितेको एक मात्र रजत पदक प्याराग्लाइडिङमा थियो।</p>
<p>सागमा प्याराग्लाइडिङबाट नेपालले कम्तीमा ६ स्वर्ण पदकको आस गरेको थियो भने खेलाडीले गत वैशाखबाट तयारी शुरु गरेका थिए।</p>
<p>प्रतियोगितामा एकल क्रस कन्ट्री महिला र पुरुष, समूह क्रस कन्ट्री महिला र पुरुष तथा एकल एक्कुरेसी महिला र पुरुष एवं समूह एक्कुरेसी महिला र पुरुष गरी आठ स्वर्णका लागि प्रतिस्पर्धा हुने तय भएको थियो।</p>
<p>नेपालले ६ स्वर्ण पदक जित्ने लक्ष्यसाथ तयारी गरे पनि प्रतियोगिता नहुने भएपछि खेलाडी तथा प्रशिक्षक निराश बनेको नेपाल प्याराग्लाइडिङ तथा ह्याडग्लाइडिङ सङ्घका महासचिव शैलेन्द्र रावतले बताए।</p>
<p>सागमा सहभागी हुने नेपाल बाहेकका अन्य प्याराग्लाइडिङको राष्ट्रिय संघ नहनु तथा स्थानीय क्लबलाई ओलम्पिक कमिटीले मान्यता नदिएकाले पनि अन्य देशको सहभागिता नभएको रावतको भनाइ छ।</p>
<p>महिला क्रिक्रेट, महिला फुटबल, आर्चरी, बीच भलिबल, ब्याडमिन्टन, ह्याण्डबल, भारोत्तोलन र ट्र्याथलन खेल गरी आठ प्रतियोगिता भने पोखरामा सञ्चालन गर्ने तयारी गरिएको छ।</p>
<p>पोखरामा हुने साग खेलकुदमा १४४ खेलाडी सहभागी बन्नेछन्, जसमा महिला ९२ र पुरुष ५२ छन्।</p>
<p>आर्चरीको प्रतियोगितास्थल र अभ्यासस्थल पोखरा रङ्गशाला तोकिएको छ।</p>
<p>भारत्तोलन पोखरा–१२ स्थित केसी क्याटरिङ सर्भिस, ह्याण्डबल रङ्गशालामा हुनेछ।</p>
<p>फुटबलको प्रतियोगिता रङ्गशालामा हुनेछ भने गौरीशङ्कर खेल मैदान पोखरा–२५, गोस्तेघाट लामाचौर र नेपाली सेनाको पश्चिम पृतनामा अभ्यासस्थल तोकिएको छ।</p>
<p>बीच भलिबल फेवाताल किनार बाराहीघाट, ट्रायथोलन बसुन्धरापार्क, ब्याडमिन्टन रङ्गशाला, क्रिकेटको अभ्यासस्थल नगर विकास प्रशिक्षण केन्द्र तथा प्रतियोगिता रङ्गशालामा सञ्चालन हुने साग प्राविधिक समितिका सचिव बलराम थापाले जानकारी दिए। <em>रासस</em></p>
प्रतिक्रिया दिनुहोस्
.jpg)
