भौतिक पूर्वाधारलाई तीव्रता दिने मन्त्री नेम्वाङकाे प्रतिबद्धता
<p>काठमाडाैं। भौतिक पूर्वाधार तथा यातायातमन्त्री वसन्तकुमार नेम्वाङले समृद्ध नेपाल निर्माणसँग जोडिएको आफ्नो मन्त्रालयका काम कारवाहीलाई गति प्रदान गर्न प्रतिबद्ध रहेको बताएका छन्।</p>
<p>आजदेखि कार्यभार सम्हालेका मन्त्री नेम्वाङले विगतका कमी कमजोरीलाई सच्याउँदै ‘समृद्ध नेपाल, सुखी नेपाली’को राष्ट्रिय आकांक्षा पूरा गर्न मन्त्रालयले जोड दिने बताए।</p>
<p>मन्त्रालयमा पत्रकारसँग संक्षिप्त कुरा गर्दै उनले उपयुक्त नीति बनाउने, भएका नीति तथा कार्यक्रमलाई अगाडि बढाउने र समस्याको समाधानमा सहजीकरण गर्ने प्रतिबद्धता व्यक्त गरे।</p>
<p>काठमाडौंलगायत विभिन्न क्षेत्रमा धुलो उड्ने, कालोपत्रे उप्कनेलगायतका विविध समस्या यथावत् रहेको आफूलाई जानकारी रहेकाले छिट्टै तिनको समाधानमा लाग्ने जनाउँदै मन्त्री नेम्वाङले सडक, रेल र यातायात विभागले गरेका काम कारवाहीका विषयमा अध्ययन गरेर उचित निर्णय लिने धारणा व्यक्त गरे।</p>
<p>उनले भने, “जलमार्गका केही नीति बनिसकेका छैनन्, रेलमार्गका कुरा केही बन्दै गरेका छन्। राष्ट्रिय महत्वका योजना छन्, यी सबै काम द्रुत गतिमा लैजानु जरुरी छ।”</p>
<p>मन्त्री नेम्वाङले विगतभन्दा धेरै कुराहरू सुधार आएको दाबी गर्दै त्यसलाई अझै तीव्रता दिने बताए। <em>रासस</em></p>
प्रतिक्रिया दिनुहोस्
.jpg)
