छुट्टाछुट्टै दुर्घटनामा दाङमा दुईजनाको मृत्यु
<p>दाङ। दाङमा भएको छुट्टाछुट्टै दुर्घटनामा दुईजनाको मृत्यु भएको छ।</p>
<p>आज साँझ पौने ६ बजे लमही–६, बेलदमारमा टिप्परले मोटरसाइकललाई ठक्कर दिँदा एकजनाको मृत्यु भएको छ।</p>
<p>ठक्करबाट मोटरसाइकल चालक घोराही–३, बेलुवाका ५८ वर्षीय बन्दुराम थारुको मृत्यु भएको दाङ प्रहरीले जनाएको छ।</p>
<p>थारुको अस्पताल लैजाने क्रममा बाटोमै मृत्यु भएको हो।</p>
<p>प्रहरीका अनुसार लमहीदेखि घोराहीतर्फ आउँदै गरेको रा १ ब ४८७ को मोटरसाइकललाई सोही दिशातर्फ आउँदै रा १ ख १२७१ नम्बरको टिप्परले ठक्कर दिएको थियो।</p>
<p>टिप्पर चालक फरार रहेकाले खोजी कार्य तीव्र पारिएको प्रहरीको भनाइ छ।</p>
<p>यस्तै आज दिउँसो साढे १ बजे लमही–५, बसपार्कमा बसबाट ओर्लने क्रममा एक महिलाको मृत्यु भएको छ।</p>
<p>प्युठानबाट तुलसीपुर दाङतर्फ आउँदै गरेको ना५ख४७२९ नम्बरको बसबाट ओर्लने क्रममा पछाडिको टायरले किच्दा प्युठान माण्डवी–४, डाँडाकटेरी बस्ने ४६ वर्षीया पवित्रा सुनारको मृत्यु भएको हो।</p>
<p>दाङ प्रहरीका अनुसार गम्भीर घाइते सुनारलाई लमही अस्पतालमा सामान्य उपचारपछि बुटवल रिफर गरिएको थियो।</p>
<p>उनको उपचारका क्रममा मर्सिसिटी अस्पताल बुटवलमा अपरान्ह ५ बजेतिर मृत्यु भएको प्रहरीले जनाएको छ।</p>
<p>बस र चालक प्रहरीको नियन्त्रणमा छन्।</p>
प्रतिक्रिया दिनुहोस्
.jpg)
