उच्च अदालतले महरालाई थुनामा राख्ने आदेशकाे कैफियत प्रतिवेदन मगायो
<p>काठमाडौं। बलात्कार प्रयासको अभियोग लागेका पूर्वसभामुख कृष्णबहादुर महराले दिएको निवेदनमा सुनुवाइ गर्दै आज उच्च अदालत पाटनले जिल्ला अदालतबाट कैफियत प्रतिवेदन माग गर्ने आदेश गरेको छ।</p>
<p>उच्च अदालत पाटनका मुख्य न्यायाधीश नहकुल सुवेदीको इजलासले पुर्पक्षका लागि थुनामा राख्ने जिल्ला अदालतको आदेशविरुद्ध महराले दिएको निवेदनमा सुनुवाइ गर्दै कैफियत प्रतिवेदन माग गरेको हो।</p>
<p>जिल्ला अदालतले कैफियत प्रतिवेदन पठाएपछि अर्को सुनुवाइ हुने उच्च अदालतका रजिष्ट्रार बाबुराम दाहालले जानकारी दिए।</p>
<p>सुनुवाइपछि उच्च अदालतले महरालाई पुर्पक्षका लागि थुनामै राख्ने, धरौटी लिएर तारेखमा छाड्ने वा साधारण तारेखमा छाड्नेमध्ये एक आदेश दिनेछ।</p>
<p>महराले जिल्ला अदालतको आदेश बदर गर्न माग गर्दै ५ मंसीरमा उच्च अदालतमा निवेदन दिएका थिए।</p>
<p>संसद सचिवालयमा कार्यरत महिला कर्मचारीलाई बलात्कारको प्रयास गरेको अभियोगमा काठमाडौं जिल्ला अदालतले १८ कात्तिकमा उनलाई पुर्पक्षका लागि थुनामा पठाएको थियो।</p>
<p>उनी डिल्लीबजार कारागारमा छन्।</p>
प्रतिक्रिया दिनुहोस्
.jpg)
