सार्वजनिक खरिद अनुगमनको कार्यालयमा निर्माण व्यवसायीको धर्ना
<p>काठमाडौं। निर्माण व्यवसायीहरूले आज सार्वजनिक खरिद अनुगमनको कार्यालयमा धर्ना दिएका छन्। </p>
<p>सार्वजनिक खरिद ऐन निर्माणमैत्री बनाउन सरकारलाई दवाव दिंदै आएका उनीहरूले आज काठमाडौंको ताहाचालस्थित् सार्वजनिक खरिद अनुगमनको कार्यालयमा एक घण्टा धर्ना दिएका हुन्।</p>
<p>नेपाल निर्माण व्यवसायी महासंघको नेतृत्वमा निर्माण व्यवसायीहरूको टोली धर्ना दिन पुगेको थियो। सार्वजनिक खरिद नियमावली–२०७६मा गरिएको निर्माण कम्पनीहरूको म्याद थप र बैंक क्रेडिट लाईन सम्बन्धी व्यवस्था तत्काल संशोधन गर्न माग गर्दै उनीहरूले सरकारविरुद्ध आन्दोलन गर्दै आएका छन्।</p>
<p>टोलीले अनुगमन कार्यालयका सचिव मोहनकृष्ण सापकोटालाई भेटेर आफूहरूको समस्या समाधानका लागि सरकारसँग सहजीकरणको भूमिका निर्वाह गरिदिन आग्रह गरे।</p>
<p>अवरुद्ध रहेको विकास निर्माणको कामलाई सूचारु हुने गरी आफूहरूको समस्या समाधानका लागि सहजीकरण गर्न अनुगमन कार्यालयका सचिव सापकोटालाई ज्ञापन पत्र बुझाइएको महासंघका अध्यक्ष रवि सिंहले जानकारी दिए।</p>
<p>उनले आफूहरूको समस्या समाधानका लागि तत्काल वार्ता समिति गठन गर्न पनि अनुगमन कार्यालयको ध्यानाकर्षण गराएको बताए ।</p>
<p>अनुगमन कार्यालयका सचिव सापकोटाले पनि ऐन संशोधन गरेर निर्माण व्यवसायीहरूको माग सम्बोधन गर्न सहजीकरणको भूमिका निर्वाह गर्ने प्रतिवद्धता व्यक्त गरे। </p>
<p>उनले निर्माण व्यवसायीको माग सम्बोधन गर्नका लागि आफूहरुले कानुनी परामर्शको काम शुरू गरिसकेको पनि जानकारी दिए।</p>
<p>सचिव सापकोटाले निर्माण व्यवसायीले राखेका माग सम्बोधन गर्न मुख्यसचिव नेतृत्वको उच्च स्तरीय समितिसँग पनि छलफल भइरहेको बताए।</p>
प्रतिक्रिया दिनुहोस्
.jpg)
