Others

गृहपृष्ठ

धर्नामा बसेका विद्यार्थीमाथि नेशनल मेडिकल कलेज प्रशासनको धरपकड काठमाडौं। वीरगन्जस्थित नेशनल मेडिकल कलेजले सरकारले तोकेभन्दा झन्डै छ लाख बढी शुल्क उठाएपछि आन्दोलनरत विद्यार्थीहरूमाथि कलेज प्रशासनले धरपकड गरेको छ। ६ मंसीरमा कलेजमा धर्नामा बसेका छात्रामाथि कुटपिट र धरपकड भएको विद्यार्थीहरूले बताएका छन्।  शिक्षा मन्त्रालयले तोके भन्दा बढी शुल्क लिएका मेडिकल कलेजहरूलाई त्यस्ताे शुल्क फिर्ता गर्न चेतावनी दिएको थियो । शुल्क फिर्ता नगरे कारबाही गर्ने मन्त्रालयको चेतावनीसमेत कलेजहरूले अटेरी गरेका छन्।  विद्यार्थीहरू त्यसैकाे विराेधमा धर्ना बसेका हुन्।  कलेज प्रशासनले प्रहरीकै अगाडि धरपकड गर्दा पनि सुरक्षा दिनुको साटो प्रहरीले झन् त्रसित बनाएको विद्यार्थीहरूले बताएका छन्।  “हामीमाथि कलेज प्रशासनसम्बद्ध व्यक्तिहरूले कुटपिट र धरपकड गरे। सुरक्षा माग्दा प्रहरीले उल्टै दुर्व्यवहार गर्&zwj;यो,” कलेजका एक विद्यार्थीले देखापढीसँग भने,“उनीहरूमाथि कारवाहीको माग राखेर प्रहरीकहाँ पुग्यौं, प्रहरीले प्रमाण ल्याएर आउन भन्यो।” विद्यार्थीहरू राति १ बजेसम्म जिल्ला प्रहरी कार्यालयमा धर्ना बसेका थिए। विद्यार्थीहरूले कुटपिट र धरपकड गर्नेमाथि कारबाही हुनुपर्ने माग राखेका छन्। आन्दोलनरत विद्यार्थीहरूले आज दिउँसो विरोध र्&zwj;याली गर्ने जनाएका छन्। कुटपिट गर्नेलाई पक्राउ गरेर कारबाही नगरेसम्म आन्दोलन नराेक्ने उनीहरूको अडान छ। आजै विद्यार्थीहरूले प्रमुख जिल्ला अधिकारीलाईसमेत भेटेर ध्यानाकर्षण गराउने बताएका विद्यार्थीहरूले राति नै उजुरी दिन खोजे पनि प्रहरीले लिन नमानेको बताउँछन्। मेडिकल कलेजले गैरकानुनी शुल्क उठाएको विरोधमा धर्ना बसेका विद्यार्थीलाई नेशनल मेडिकल कलेज वीरगन्जले ५ मंसीरमा केहीघन्टा होस्टल पस्न रोक लगाएको थियो। यस विषयमा कलेज प्रशासनसँग बुझ्न खोज्दा सम्पर्क हुन सकेन।  नेशनल मेडिकल कलेजले एमबिबिएसमा सय सिट संख्यामा विद्यार्थी भर्ना गरेको छ। सरकारले राजधानीबाहिरका मेडिकल कलेजमा एमबिबिएस अध्ययनका लागि ४२ लाख ५० हजार रूपैयाँ शुल्क तोकेको छ। तर, उक्त मेडिकल कलेजले एमबिबिएस पहिलो वर्षका विद्यार्थीबाट ५५ लाख रूपैयाँसम्म शुल्क उठाएको एक विद्यार्थीले जानकारी दिए।