साढे पाँच किलो गाँजासहित मकवानपुरमा दुईजना पक्राउ
<p>मकवानपुर। साढे पाँच किलो लागुऔषध गाँजासहित दुईजनालाई मकवानपुर प्रहरीले पक्राउ गरेको छ।</p>
<p>गएराति इलाका प्रहरी कार्यालय नेवारपानी, मकवानपुरको टोलीले हेटौंडा उप–महानगरपालिका–१९, पश्चिम लोकमार्ग नजिकैबाट बारा निजगढ नगरपालिका–१२ का २७ वर्षीय राजकुमार तितुङ्ग र ३२ वर्षीय वीरबहादुर तितुङ्गलाई पक्राउ गरेको हो।</p>
<p>प्रहरीका अनुसार मनहरीबाट हेटौंडातर्फ आउँदै गरेको बा५७प २३४३ नम्बरको मोटरसाइकलमा सवार उनीहरूलाई जाँच गर्दा गाँजा बरामद भएको हो।</p>
<p>वीरबहादुरको झोलाभित्र प्लाष्टिकमा राखी डोरीले बाँधी चारपाटे आकार बनाई राखेको अवस्थामा लागुऔषध गाँजा बरामद भएको जिल्ला प्रहरी कार्यालय मकवानपुरले जनाएको छ।</p>
<p>उनीहरूमाथि थप अनुसन्धान भइरहेको प्रहरीको भनाइ छ।</p>
<p>प्रहरीले उनीहरूविरुद्ध लागुऔषध नियन्त्रण ऐन, २०३३ अन्तर्गत मुद्दा चलाउने जनाएको छ।</p>
<p>यो ऐनमा दुई वर्षदेखि १० वर्षसम्म कैद र १५ हजारदेखि एक लाख रुपैयाँसम्म जरिवाना तथा सवारीसाधनसमेत जफत हुने प्रावधान छ।</p>
<p> </p>
प्रतिक्रिया दिनुहोस्
.jpg)
