सिरहाबाट लागुऔषधसहित दुई जना पक्राउ
<p>लहान। लागुऔषधसहित सिरहा प्रहरीले गएराति दुई युवकलाई पक्राउ गरेको छ। </p>
<p>प्रहरी चौकी सीतापुरको गस्ती टोलीले लक्ष्मीपुर पतारी गाउँपालिका-६ कचनारीस्थित भोटियाचोकबाट लागुऔषधसहित सप्तरीको बलान बिहुल गाउँपालिका-१ मलहनिया निवासी २१ वर्षीय अमरेश यादव र २१ वर्षीय पंकज यादवलाई पक्राउ गरेको हो। </p>
<p>भारतीय बजारतर्फबाट स १० प ६१९ नम्बरको मोटरसाइकलमा आउँदै गरेका दुवै जनाबाट लागुऔषध नोफिन १० एम्पुल, डाइजिल्याप १० एम्पुल, प्रोमेथाजिन १० एम्पुल बरामद गरिएको प्रहरीले जनाएको छ। </p>
<p><em>त्यसैगरी </em> सिरहा प्रहरीले जिल्लाका विभिन्न स्थानमा करीब तीन हजार गाँजाको बोट नष्ट गरेको छ।</p>
<p>प्रहरी चौकी सन्हैठाले सिरहा नगरपालिका-२२ सन्हैठामा स्थानीयवासीले लगाएको दुई हजार ५०० बोट तथा इलाका प्रहरी कार्यालय लहानबाट खटिएको प्रहरी टोलीले लहान नगरपालिका-२२ डाँडाटोलमा १०० बोट गाँजा फडानी गरेको हो। <em>रासस</em></p>
प्रतिक्रिया दिनुहोस्
.jpg)
