केन्यामा पहिरोमा परेर ३७ को मृत्यु
<p>केन्या। केन्यामा पहिरोमा परेर मृत्यु हुनेको संख्या ३७ पुगेको छ।</p>
<p>दुईदिनअघि रातिकाे समयमा पहिरोमा परी मृत्यु हुनेको संख्या बढेर अहिलेसम्म ३७ पुगेको पुष्टि सरकारी अधिकारीहरूले गरेका हुन्।</p>
<p>देशको उत्तरपश्चिमी क्षेत्रमा पर्ने वेस्ट पोकोटमा घटना भएको स्थानीय सञ्चारमाध्यमहरूले जनाएका छन्।</p>
<p>केन्याका राष्ट्रपति उहुरु केन्याटाले मृतकप्रति श्रद्धान्जली व्यक्त गर्दै मृतकका परिवारप्रति समवेदना प्रकट गरेका छन्।</p>
<p>उनले प्रकाशित गरेको शोक वक्तव्यमा पहिरोका कारण बेपत्ता भएकाहरूको खोजी कार्य जारी राख्न र बेपत्ता तथा मृतकका परिवारलाई सहयोग गर्ने प्रतिबद्धता गरिएको छ।</p>
<p>त्यसैगरी आगामी दिनमा यसैगरी ज्यान गुमाउनुपर्ने अवस्था आउन नदिने तर्फ अहिलेदेखि नै सतर्कता अपनाउन पनि राष्ट्रपति केन्याटाले आह्वान गरेका छन्।</p>
<p>केन्याका गृहमन्त्री फ्रेड मातीअङले पहिरो प्रभावित क्षेत्रमा उद्धार तथा राहतका कामहरू भइरहेको जानकारी दिए।</p>
<p>“उद्धार तथा राहतको कामहरू भइरहेको छ, त्यसका लागि सुरक्षाकर्मीहरूको टोली र मानवीय सहायतासम्बन्धी निकायका व्यक्तिहरू खटिएका छन्,” उनले भने।</p>
<p>प्रतिकूल मौसमका कारण खोजी तथा उद्धार कार्यमा कठिनाइ भइरहेकाे उनले जानकारी दिए। </p>
<p>थप क्षति हुनबाट बचाउने प्रयास नै अहिलेको प्राथमिकता भएको उनको भनाइ छ।</p>
<p>पहिरो प्रभावितहरूलाई अत्यावश्यक सेवा सुविधाहरूको अभाव रहेको बताइएको छ।</p>
<p>केन्याको यो घटनास्थल छिमेकी मुलुकहरू युगान्डा र दक्षिणी सुडानबाट पनि नजिक पर्दछ ।</p>
<p>प्राकृतिक श्रोतसाधन र भाैतिक संरचनाहरूको जथाभाबि प्रयोग तथा दोहन, अत्यधिक धेरै बाटो र पुलहरूको निर्माणलगायतका कारणले पहिरो गएको बताइएको छ। <em>रासस-सिन्ह्वा</em></p>
प्रतिक्रिया दिनुहोस्
.jpg)
