हजुरआमाका कथा भन्दै अमृता
<p>काठमाडौं। महिला अधिकारमा लेखनमार्फत् क्रियाशील लेखक अमृता लम्सालको पहिलो पुस्तक ‘हजुरआमाका कथा’ विमोचन भएको छ। आज काठमाडौंमा उनको पुस्तक विमोचन भएको हो। </p>
<p>पुस्तकमा ८० वर्ष कटेका महिलाका कथा समेटिएको छ। किताबमा समेटिएका पात्रहरूले नै किताब विमोचन गरेका थिए।</p>
<p>विमोचन कार्यक्रममा पुस्तकमाथि टिप्पणी गर्दै लैंगिक समानताकी अभियन्ता भारती सिलवाल गिरीले ‘हजुरआमाका कथा’ महिलाको इतिहास भएको उल्लेख गरिन्।</p>
<p>"इतिहासमा महिलाको कथा समेटिएको छैन। यो पुस्तकले त्यो अपूर्णता पूरा गर्ने प्रयत्न गरेको छ।", गिरीले भनिन्।</p>
<p>मानवशास्त्री डा. डम्बर चेम्जोङले पुस्तकले ५०/६० वर्ष पहिलेको समाजमा महिलाले भोगेको बुहार्तनको सग्लो तस्विर कोरेको उल्लेख गरे ।</p>
<p>भने, "यो पुस्तकले समाजमा रहेको विभिन्न विभेदको उजागर गरेको छ। महिलामाथि हुने विभेदको सामाजिक र सांस्कृतिक आयाम प्रस्तुत गरेको छ।"</p>
<p>लेखक अमृता लम्सालले पुस्तक लेखनको भित्री कथा बताइन्। मिडियाले महिलाको आवाज कहिल्यै नसुनेको गुनासो पनि गरिन् ।</p>
<p>"मिडियाले अहिले पनि महिला चिन्दैन। उनीहरूको सामाजिक-राजनीतिक आयाम बुझ्दैन। महिलाका कथालाई गन्थन देख्छ।"</p>
<p>अक्षर क्रिएसन्सले पुस्तक प्रकाशन गरेको हो।</p>
<p>प्रकाशन संस्थाकी अर्चना थापाले आफूहरूले महिलाका लेखनकर्मलाई प्रकाशनमा ल्याउन काम गरिरहेको उल्लेख गरिन्।</p>
<p>"हामीले लेखकमात्र होइन, सम्पादक, लेआउट डिजाइनर र प्रेस समेत महिलाकै छनौट गरेका छौं", थापाले भनिन्।</p>
<p> </p>
प्रतिक्रिया दिनुहोस्
.jpg)
