झुलाघाट नाका आज साँझदेखि खुल्ने
<p>बैतडी। भारतसँग सीमा जोडिएको बैतडीको झुलाघाट नाका आज साँझदेखि खुल्ने भएको छ।</p>
<p>भारतमा आज जारी विधानसभाको उपनिर्वाचनको सुरक्षा संवेदनशीलता कारण जनाउँदै चार दिनदेखि नाका बन्द छ।</p>
<p>विधानसभाको उपनिर्वाचन सम्पन्न भएपश्चात साँझ ५ बजेदेखि नाका पुनः सञ्चालनमा आउने बैतडीका निमित्त प्रमुख जिल्ला अधिकारी लोकेन्द्रसिंह नेगीले जानकारी दिए।</p>
<p>सुरक्षा संवेदनशीलता कारण जनाउँदै भारतले ६ मंसीर साँझ ५ बजेदेखि आज साँझ ५ बजेसम्म सिमानाका बन्द राख्न अनुरोध गरेको थियो। </p>
<p>यसअघि गत १८ असोजमा भारतको पिथौरागढमा जिल्ला पञ्चायत तथा ग्राम पञ्चायत सदस्य निर्वाचन हुँदा पनि १६-१८ असोजसम्म झुलाघाट नाका बन्द गरिएको थियो। <em>रासस</em></p>
प्रतिक्रिया दिनुहोस्
.jpg)
