जापानमा नेपाली अवार्ड समारोहको ‘हरिबिजोग’
<p>काठमाडौं। अवार्ड समारोहमा दर्शक कति होलान्?</p>
<p>त्यसमाथि मह जोडी, नायक अनमोल केसी, नीर शाहलगायत दर्जनौं चर्चित कलाकार उपस्थित भएपछि हल नभरिने कुरै भएन।</p>
<p>तर, जापानमा भएको नेपाली अवार्ड समारोह भने खल्लो भयो।</p>
<p>दर्शकको उपस्थिति पातलियो।</p>
<p>नेपालबाट चर्चित कलाकारहरू लगेर आयोजना गरिए पनि दर्शकको संख्या न्यून रहेपछि कार्यक्रमकै ‘हरिबिजोग’ भयो।</p>
<p>आयोजकले कार्यक्रमलाई भव्य बनाउन भन्दै लामो समयदेखि प्रचारप्रसार पनि गरेका थिए । तर पनि दर्शक आएनन्।</p>
<p>कारण थियो, सो समारोह मानव तस्करीको आरोप लागेको सूर्य कर्पोरेसनले आयोजना गर्नु।</p>
<p style="text-align:center"><img alt="" height="448" src="https://www.dekhapadhi.com/storage/photos/shares/Entertainment/japan-award-1-1.jpg" width="840" /></p>
<p>कर्पोरेसनले २४ नोभेम्बरमा टोकियोस्थित नाखानो जेरो हलमा अवार्ड समारोह गरेको थियो।</p>
<p>आयोजक संस्थाका सदस्यहरूलाई मानव तस्करी गरेको आरोप लागेपछि जापानमा रहेका संघसंस्था र नेपालीहरूले विरोध जनाउँदै आएका छन्।</p>
<p>उक्त आरोपको तत्काल खण्डन गर्दै आयोजक संस्थाले विज्ञप्ति जारी गरेको थियो।</p>
<p>त्यति गर्दा पनि अवार्ड समारोहमा दर्शक नआउनुलाई संस्थाले गरेको खण्डनप्रति त्यहाँस्थित नेपाली र संघसंस्थाको असन्तुष्टिको रूपमा लिइएको छ।</p>
<p>सामाजिक सञ्जालमा अवार्ड समारोहको विरोध भइरहेको छ।</p>
<p>नेपालका दर्जनौं चर्चित सेलिब्रेटी भएको अवार्ड समारोहको जापानमा यसरी ‘हरिबिजोग’ भएपछि सामाजिक सञ्जालमा विभिन्न टीका टिप्पणी हुन थालेको छ।</p>
<p>दर्शकको संख्या एकदमै कम भएपछि आयोजकले दर्शक दीर्घाको तस्वीर सार्वजनिक गरेको थिएन। तर, त्यहाँ उपस्थित केही दर्शकले खाली कुर्सीको तस्वीर सार्वजनिक गरिदिएका थिए।</p>
<p>अवार्ड समारोहको चौतर्फी विरोध गरिए पनि आयोजकले भने यसबारे कुनै धारणा सार्वजनिक गरेको छैन।</p>
<p>सामाजिक सञ्जाल प्रयोगकर्ताहरूले कस्तो कार्यक्रम हो? कुन संस्थाले आयोजना गरेको हो? जस्ता कुराको पूर्वजानकारी लिएर मात्र कार्यक्रममा सहभागिता जनाउन कलाकारलाई आग्रह गरेका छन्।</p>
<p> </p>
प्रतिक्रिया दिनुहोस्
.jpg)
