महिला हिंसामा परेकालाई संरक्षण गर्न आश्रयस्थल
<p>काठमाडाैं। महिला हिंसामा परेकालाई संरक्षण गर्ने उद्देश्यले काठमाडौंको उत्तरी भेग मूलपानीमा करीब डेढ रोपनी क्षेत्रफलमा आश्रयस्थल निर्माण गरिएको छ। </p>
<p>लैङ्गिक हिंसामा परेकालाई आवास, मेडिकल, मनोसामाजिक एवं कानूनी परामर्श उपलब्ध गराउने उद्देश्यले निर्माण गरिएकाे साे आश्रयस्थलमा तीनवटा भवन निर्माण गरिएको छ।</p>
<p>साे आश्रयस्थलका भवनहरू सात करोड रूपैयाँ लागतमा एपेरियन नामक गैरसरकारी संस्थाले डेढ वर्षकाे अवधिमा बनाएकाे हाे।</p>
<p>आश्रयस्थल आजदेखि सञ्चालनमा ल्याइएको छ।</p>
<p>महिला हिंसा विरुद्धको १६ दिने अभियानअन्तर्गत सञ्चालनमा ल्याइएको त्यस स्थलमा व्यावसायिक तालीम, स्वास्थ्य परीक्षण, परामर्श, आवास गरी ३० कक्ष छन्।</p>
<p>जम्मा २० महिला तथा १५ बालबालिका अटाउन सक्ने क्षमताको आश्रयस्थलमा स्थानीय तह, महिला हिंसाविरुद्ध क्रियाशील संस्था तथा प्रहरीको सिफारिसमा पीडित महिलालाई आश्रय दिइने व्यवस्था गरिएको छ।</p>
<p>पीडित पक्षलाई सम्बन्धित घरपरिवारमा मेलमिलाप, व्यावसायिक तालीम र रोजगारीको प्रबन्ध गरी उनीहरूलाई आर्थिक सशक्तीकरणका कार्यक्रम सञ्चालन गरिने उद्देश्य राखिएको छ।</p>
<p>हिंसामा परेका महिलालाई सामाजिक रूपान्तरण गर्न हाउस किपिङ, खाना पकाउने, ब्युटिसियन, सुरक्षा गार्ड, बालबालिका हेरचाह र मन्टेश्वरी तालीम सञ्चालन गरिने जनाइएको छ।</p>
<p>राष्ट्रिय मानव अधिकार आयोगका सदस्य मोहना अन्सारीले भवनको उद्घाटन गर्दै महिला वर्गमाथि आर्थिक पहुँच नभएका कारणले अधिकांश महिला घरेलु हिंसाको शिकार हुने गरेकाले सामाजिक रूपान्तरणको महत्त्व रहेको बताइन्।</p>
<p>एपेरियनका प्रमुख कार्यकारी अधिकृत प्रज्ञा राईले उक्त आश्रयस्थलमा काठमाडौं तथा त्यस वरपर क्षेत्रका पीडितलाई सहयोग गर्ने उद्देश्य राखिएको बताइन्। </p>
<p>उनले अछाम, बझाङ, बाजुरा, बैतडी, ओखलढुंगा, सिन्धुली र उदयपुरमा पनि यस किसिमको स्थल सञ्चालन गरिएको जानकारी दिइन्। <em>रासस</em></p>
प्रतिक्रिया दिनुहोस्
.jpg)
