‘अकुपाई टुँडिखेल’बारे अभियन्ताले गराए महानगरपालिकाको ध्यानाकर्षण
<p>काठमाडौं। टुँडिखेल अतिक्रमणबारे तत्काल अनुगमन गरी पूर्ववर्ती अवस्थामै फर्काउन ‘अकुपाई टुँडिखेल’का अभियन्ताहरूले काठमाडौं महानगरपालिकालाई ध्यानाकर्षण गराएका छन्।</p>
<p>आज उनीहरूले महानगरपालिकाका प्रशासन विभागीय प्रमुख नमराज ढकाललाई ध्यानाकर्षण पत्र बुझाएका हुन्।</p>
<p>महानगर प्रमुख विद्यासुन्दर शाक्य अनुपस्थित रहेकाले विभागीय प्रमुखलाई पत्र बुझाइएको हो।</p>
<p>कुनै बेला एशियाकै ठूलो मैदानको रूपमा रहेको टुँडिखेल अहिले ढलान गरी बसपार्क, अनाधिकृत पसल सञ्चालन, पार्किङ, भवन, तारबार, निर्माण सामग्री र कामदार बस्ने ठाउँमा परिणत भएको छ।</p>
<p>सो स्थानहरूमा जनतालाई लगाइएको प्रत्यक्ष/अप्रत्यक्ष बन्देजहरू हटाई आवश्यक आन्तरिक कूटनीतिक पहल गरी दीर्घकालीन समस्याको समाधान गर्न अभियन्ताहरूले विभागीय प्रमुखलाई अनुरोध गरे।</p>
<p>स्थानीय सरकार सञ्चालन ऐन, २०७४ को दफा ११ अनुसार नगरपालिकाको अधिकारअन्तर्गत उपदफा २(छ)मा सार्वजनिक ऐलानी र पर्ती जग्गा, सार्वजनिक भवन, सम्पदा तथा भौतिक पूर्वाधारको संरक्षण र सुरक्षा तथा २(ट)मा अनाधिकृत निर्माण तथा सार्वजनिक सम्पत्ति अतिक्रमण रोकथाम तथा नियन्त्रण गर्ने कानुनी दायित्व नगरपालिकालाई दिएको छ।</p>
<p>त्यसैले स्थानीय सरकारको अग्रसरता बिना सार्वजनिक सम्पत्तिको संरक्षण र सम्वर्द्धन हुन नसक्ने भन्दै अभियन्ताहरूले महानगरपालिकाकाे ध्यानाकर्षण गराएका हुन्। </p>
<p>विभागीय प्रमुख ढकालले टुँडिखेलमा रहेको बसपार्कलगायत संरचना हटाउन पहल गर्ने आश्वासन दिए।</p>
<p> </p>
प्रतिक्रिया दिनुहोस्
.jpg)
