गुरूयाेजनाअनुसार नेपालगञ्ज विमानस्थल विस्तारकाे काम
<p>बाँके। नेपालगञ्ज विमानस्थल विस्तारको काम धमाधम भइरहेको छ।</p>
<p>नागरिक उड्डयन प्राधिकरणका महाप्रबन्धक राजन पोखरेलका अनुसार विमानस्थलमा सबै प्रकारका अन्तर्राष्ट्रिय उडान गर्न मिल्ने गरी गुरुयोजनामा नक्साङ्कन र डिजाइन गरिएको छ।</p>
<p>केही समयअघि नेपालगञ्ज आएका पर्यटनमन्त्री योगेशकुमार भट्टराईले सरोकारवालासँगको छलफलमा भनेका थिए, “नेपालगञ्ज विमानस्थलको गुरुयोजना कार्यान्वयनमा आइसकेकाले समयमै काम सम्पन्न गर्न बजेटमा पनि कुनै प्रकारको कमी हुन दिइनेछैन।”</p>
<p>शुरुआती चरणमा एटिआर विमान उडान गर्न मिल्ने गरी नेपालगञ्ज विमानस्थल विस्तार गरिनेछ भने दुई दशकभित्र एअर बस जस्ता ठूला विमान उडान भर्न मिल्ने गरी गुरुयोजनामा डिजाइन गरिएको छ।</p>
<p>नागरिक उड्डयन प्राधिकरणका महाप्रबन्धक पोखरेलले नेपालगञ्ज विमानस्थल विस्तार गुरुयोजनामा निर्माणको अनुमानित लागत १२ अर्ब रहेको बताए।</p>
<p>विमानस्थल विस्तार चार चरणमा हुनेछ।</p>
<p>पहिलो र दोस्रो चरणको काम अहिले धमाधम भइरहेकाे छ। धावन मार्ग विस्तार, टर्मिनल भवनलगायतका काम गर्न जग्गा अधिग्रहणको काम चाँडै शुरू हुने महाप्रबन्धक पोखरेलकाे भनाइ छ।</p>
<p>उनले अन्तर्राष्ट्रियस्तरको विमानस्थलका लागि विस्तृत परियोजना प्रतिवेदन (डीपीआर)अनुसार नै काम अगाडि बढाउँदा लामो समय सम्पूर्ण उडान बन्द गरेर काम गर्नुपर्ने भएकाले डीपीआर स्वीकृतिपछि सरकारसँग लगानी माग गरिने बताए।</p>
<p>योजनाअनुसार नेपालगञ्ज विमानस्थलको रनवे थ्री–सी क्याटोगरी अर्थात् एक हजार ५२४ मिटरबाट वृद्धि गरी फोर–सी क्याटोगरीमा दुई हजार ४४५ मिटर लामो बनाइनेछ।</p>
<p>त्यसो गर्दा एयर बस ३२० ‘एनइओ’ मोडेलका ठूलो जेट विमान सहजै उडान गर्न सक्ने उनले जानकारी गराए।</p>
<p>हाल दैनिक सरदर ४० उडान हुँदै आएको नेपालगञ्ज विमानस्थलबाट झण्डै एक हजार १०० यात्रु आउजाउ गर्दछन्।</p>
<p>काठमाडौंस्थित त्रिभुवन अन्तर्राष्ट्रिय विमानस्थलपछिको सबैभन्दा व्यस्त नेपालगञ्ज विमानस्थलका लागि नयाँ गुरुयोजनाअनुसार अगाडि बढ्दा १०० बिघा जग्गा थप आवश्यक पर्नेछ।</p>
<p>हाल १६६ बिघा क्षेत्रफल रहेको नेपालगञ्ज विमानस्थलका लागि थप १०० बिघा जग्गा अधिग्रहण गरेपछि मात्र प्रस्तावित अन्तर्राष्ट्रिय विमानस्थलका लागि जग्गा पर्याप्त हुने महाप्रबन्धक पोखरेलको भनाइ थियो। <em>रासस</em></p>
प्रतिक्रिया दिनुहोस्
.jpg)
