Others

गृहपृष्ठ

भ्रमण वर्ष सफल बनाउन आतिथ्य महत्वपूर्ण- पर्यटनमन्त्री भट्टराई काठमाडौं। संस्कृति, पर्यटन तथा नागरिक उड्डयनमन्त्री योगेशकुमार भट्टराईले नेपाल भ्रमण वर्ष २०२० अभियान सफल पार्न आतिथ्य महत्वपूर्ण हुने बताएका छन्। विश्वभरका आतिथ्य व्यवस्थापन शिक्षासम्बन्धी शैक्षिक प्रतिष्ठानको अन्तर्राष्ट्रिय सञ्जाल होटल स्कूल एशोसिएशन (इयूहोफा)को काठमाडौंमा भएको सम्मेलनको उद्घाटन गर्दै उनले नेपाल भ्रमण वर्षको अवधिमा २० लाख बाह्य पर्यटक भित्र्याउने लक्ष्यलाई सार्थक बनाउन आतिथ्यमा जोड दिनुपर्ने उल्लेख गरे।  मन्त्री भट्टराईले नेपालको प्राथमिकता प्राप्त पर्यटन उद्योग वैदेशिक मुद्रा आर्जन तथा रोजगारी सिर्जनाका लागि दिगो स्रोतका रूपमा मानिंदै आएको बताए। पर्यटन उद्योगमा नीतिगत सुधार गरी यसबाट प्रत्यक्ष वैदेशिक लगानी आकर्षित गर्न आवश्यक रहेको उनको भनाइ थियो।      यसैबीच, इयूहोफाको अध्यक्षमा नेपालको ग्लोबल एकेडेमी अफ टुरिज्म एण्ड हस्पिटालिटी एजुकेसन (गेट कलेज)का प्रमुख कार्यकारी अधिकृत खेम लकाइँ चयन भएका छन। उनी सन् २०१७ देखि उक्त संस्थाको बोर्ड सदस्य थिए। यूहोफाका नवनिर्वाचित अध्यक्ष लकाइँले नेपाल अतिथिलाई भगवानका रूपमा हेर्ने देश भएको भन्दै यहाँको आतिथ्य सत्कार विश्वभरि नै उदाहरणीय मानिएको बताए।  इयूहोफाको सञ्जालमा एशिया, युरोप, अमेरिका, अफ्रिका र अष्ट्रेलियासम्मका आतिथ्य व्यवस्थापन अध्यापन गरिने शैक्षिक प्रतिष्ठान सदस्य आबद्ध छन्। सञ्जालमा नेपालबाट १४ होटल व्यवस्थापन तथा पर्यटन शिक्षासम्बद्ध प्रतिष्ठान सदस्य छन्।      काठमाडौंमा जारी ५८औँ कंग्रेसमा दुई दर्जन मुलुकबाट करिब ७० पर्यटन तथा आतिथ्यसम्बन्धी विश्वविद्यालय एवं शैक्षिक संस्थाका प्रमुख र प्राध्यापक, पर्यटन उद्योगका नेतृत्वकर्ता र यस क्षेत्रका विभिन्न विज्ञको सहभागिता छ। नेपालले आयोजना गरेको यो अन्तर्राष्ट्रिय सम्मेलनको आतिथ्य एशियामा नै पहिलोपटक भएको बताइएको छ।  अहिलेसम्म पर्वतारोहण र पदयात्राको पर्यायवाची गन्तव्यका रूपमा मात्र चिनिएको नेपालका लागि अतिथि सत्कार परिवेशअनुरूप विश्व बजारमा देखाउने दरिलो अवसर भएको आयोजकले जनाएको छ। आजदेखि शु– भएको सम्मेलन १५ मंसीरसम्म चल्नेछ। रासस