तस्वीरसहितको परिचयपत्र देखाएर मतदान गर्न सकिने
<p>काठमाडाैं। प्रतिनिधि सभा, प्रदेश सभा सदस्य र स्थानीय तहको भाेलि, १४ मंसीरमा हुने उपनिर्वाचनमा मतदाताले फाेटाेसहितकाे परिचय पत्र देखाएर मतदान गर्न सक्ने व्यवस्था गरिएकाे छ।</p>
<p>कुनै कारणवश मतदाता परिचयपत्र प्राप्त हुन नसकेमा, हराएमा वा नष्ट भएमा सरकारी निकायबाट फोटोसहित जारी भएको परिचयपत्रका आधारमा पनि मतदान गर्न सकिने व्यवस्था गरिएको हाे।</p>
<p>नागरिकताको प्रमाणपत्र, राष्ट्रिय परिचयपत्र, राहदानी, सवारी चालक अनुमतिपत्र वा सरकारी निकायबाट तस्वीरसहित जारी भएको परिचयपत्रका आधारमा मतदान गर्न सकिने व्यवस्था गरिएको निर्वाचन आयोगले जनाएको छ।</p>
<p>मतदाता नामावली तथा मतदाता परिचयपत्रमा भएको मतदाताको विवरणमा सामान्य त्रुटि पाइएमा सानोतिनो भुलचुक मानी सरकारी निकायबाट तस्वीरसहित जारी भएको परिचयपत्रका आधारमा मतदान गर्न दिने प्रबन्ध मिलाउन पनि मुख्य निर्वाचन अधिकृतलाई निर्देशन पठाइसकेको आयोगले जानकारी दिएको छ।</p>
<p>प्रतिनिधिसभा सदस्य एक, प्रदेशसभा सदस्य तीन, उपमहानगर प्रमुख एक, गाउँपालिका अध्यक्ष तीन, उपाध्यक्ष एक र ४३ वडाध्यक्षका लागि मुलुकका ३७ जिल्लाका ५२ स्थानमा उपनिर्वाचन हुँदैछ।</p>
<p>उपनिर्वाचनलाई स्वच्छ, स्वतन्त्र, निष्पक्ष, पारदर्शी र विश्वसनीय तुल्याउन आयोगले आममतदाता, उम्मेदवार, राजनीतिक दलसहित सरोकारवाला सबै पक्षसँग सहयोगका लागि अपिल गरेको छ। <em>रासस</em></p>
प्रतिक्रिया दिनुहोस्
.jpg)
