साग उद्घाटनमा नेपालको झन्डा पारसले होइन, कमलले बोक्ने
<p>काठमाडौं। नेपाली क्रिकेट टोलीका पूर्वकप्तान पारस खड्काले १३औं दक्षिण एशियाली खेलकुद(साग) को मार्चपासमा झण्डा नबोक्ने भएका छन्।</p>
<p>अब उद्घाटन सत्रमा नेपालको झण्डा भारोत्तोलनका खेलाडी कमल अधिकारीले बोक्नेछन्। </p>
<p>नेपाल ओलम्पिक कमिटीले खेल अनुभव, अन्तर्राष्ट्रिय पदक र ओलम्पिक खेलमा समेत सहभागिता जनाइसकेको आधारमा कमललाई झन्डा बोक्न दिने निर्णय गरेको हो।</p>
<p>यसअघि १३औं सागको प्राविधिक समितिले नेपाली क्रिकेट टोलीका पूर्वकप्तान पारसलाई झन्डा बोक्ने जिम्मेवारीमा सिफारिस गरेको थियो।</p>
<p>समारोह समितिले त्यसलाई पारित गरेको समितिका सचिव कुलबहादुर थापाले बताएका थिए।</p>
<p>ओलम्पिक कमिटीका अनुसार अब भारोत्तोलनका खेलाडी कमलले उद्घाटन समारोहमा नेपालको राष्ट्रिय झण्डा बोक्नेछन्। </p>
<p>कमलले ९औं सागदेखि भाग लिँदै आएका छन्।</p>
<p>त्यसपछि १०औंं र ११औं सागमा पनि भाग लिएका कमलले १२औं सागमा भने सहभागिता जनाएनन्।</p>
<p>यो १३औं साग कमलको चौथो साग हो। उनले श्रीलंकाको कोलम्बोमा सम्पन्न १०औं सागमा स्वर्ण पदक जितेका थिए।</p>
<p>कमलले कोरियामा सम्पन्न २०१७ को एशियन च्याम्पियनसिपमा ३ कास्य पदक जितेका थिए।</p>
<p>पारसले नेपाली राष्ट्रिय क्रिकेट टोलीलाई एक दशकभन्दा बढी समय कप्तानी गरेका थिए।</p>
<p>यसअघि समारोह समितिले खेलाडीको तर्फबाट आयषा शाक्यले शपथ लिने, ओलम्पियन तथा कीर्तिमानी पदक विजेता दीपक विष्टले ओलम्पिक टर्च बाल्ने र रेफ्रीको तर्फबाट ब्याडमिन्टन एशिया सर्टिफिकेटेड दीपक थापाले शपथ लिने जनाएको थियो।</p>
<p style="text-align:center"><img alt="" height="886" src="https://www.dekhapadhi.com/storage/photos/shares/Sports/olympion_comitee_decision.jpg" width="840" /></p>
<p> </p>
प्रतिक्रिया दिनुहोस्
.jpg)
