काष्ठमण्डपका लागि थप काठ धनगढीबाट ल्याइने
<p>काठमाडाैं। काष्ठमण्डप पुनःनिर्माणका लागि अभाव भएको आवश्यक आठ हजार क्युफिट काठ धनगढीबाट ल्याइने भएको छ।</p>
<p>अपुग भएको काठ आगामी १५ पुससम्ममा ल्याइने तयारी गरिएको छ।</p>
<p>छानाका लागि काठको समस्या भएको र त्यसका लागि आठ हजार क्युफिट काठ आवश्यक पर्ने हुँदा उक्त स्थानबाट काठ ल्याउने तयारी गरिएको हो।</p>
<p>निर्माणअन्तर्गत अहिले दोस्रो तलाको कामसँगै झ्यालढोकामा बट्टा कुद्ने काम भइरहेको काष्ठमण्डप पुनःनिर्माण समितिका अध्यक्ष राजेश शाक्यले बताए।</p>
<p>त्यसैगरी अहिले ५० प्रतिशत काम सम्पन्न भएको छ।</p>
<p>“अहिले मुख्य चार थाम राखी बीचमा गारो लगाउने काम सकिएको छ”, शाक्यले भने। </p>
<p>समयमा नै काठको व्यवस्था भए यसअघिको भन्दा तीव्ररूपमा काम हुने जनाइएको छ।</p>
<p>निर्माणका लागि अहिले दैनिक ३० कामदारले नियमितरूपमा काम गरिरहेका छन्।</p>
<p>२०७२ को भूकम्पले पूर्णरूपमा क्षति पुगेको ऐतिहासिक काष्ठमण्डप पुनःनिर्माणका लागि गत ३१ वैशाखमा क्षमा पूजा गरिएको थियो।</p>
<p>२२ कात्तिकमा शुभारम्भ पूजा गरेर विधिवत् रूपमा सो सम्पदाको पुनःनिर्माण शुरू गरिएको हो।</p>
<p>तीन वर्षभित्र पुनःनिर्माण सक्ने लक्ष्य राखिएको छ।</p>
<p>गत २७ माघ श्रीपञ्चमीका दिन निर्माणाधीन काष्ठमण्डपको मूल थाम उठाइएको थियो।</p>
<p>प्रयोग गरिएका चार थाममध्ये तीन नयाँ प्रयोग गरिएका र एउटा थाम पुरानै प्रयोग गरिएको समितिले जनाएको छ।</p>
<p>उक्त ऐतिहासिक सम्पदा पुनःनिर्माणका लागि १९ करोड खर्च लाग्ने अनुमान गरिएकामा काठमाडौं महानगरपालिकाले पुनःनिर्माण समितिलाई पाँच करोड ५० लाख रूपैयाँ आर्थिक सहयोग गरिसकेको छ।</p>
<p>पुनःनिर्मणका लागि जम्मा १७ हजार ५८ क्युफिट काठ आवश्यक पर्दछ।</p>
<p>चार वर्षभित्र निर्माण कार्य सक्ने गरी सातौं शताब्दीको काष्ठमण्डप पुनःनिर्माणको काम भइरहेको छ। <em>रासस</em></p>
प्रतिक्रिया दिनुहोस्
.jpg)
