Others

गृहपृष्ठ

पुरूष भलिबलः श्रीलंकालाई हराउँदै पाकिस्तान सेमिफाइनलमा काठमाडाैं। उत्कृष्ट पुनरागमन गरेको पाकिस्तानले आज श्रीलंकालाई ३-१ को सेटमा हराउँदै १३औं दक्षिण एशियाली खेलकुद  (साग)अन्तर्गत पुरुष भलिबलको समूह विजेता बन्दै सेमिफाइनलमा प्रवेश गरेको छ। पाकिस्तान समूह 'बी' को विजेता बनेको हो। पाकिस्तानले समूह 'बी' को २ खेलमा ४ अंक जोड्यो।  २ खेलबाट २ अंक जोडेको श्रीलंका उपविजेता बन्दै अन्तिम चारमा पुग्यो। समूहका दुवै खेल हारेको माल्दिभ्स प्रतियोगिताबाट बाहिरिएको छ। पाकिस्तानले सेमिफाइनलमा  समूह 'ए' को उपविजेता बंगलादेशसँग खेल्नेछ। श्रीलंकाले समूह 'ए' को विजेता भारतसँग प्रतिस्पर्धा गर्नेछ। त्रिपुरेश्वरस्थित राखेप कभर्डहलमा पाकिस्तानले पहिलो सेट हारेको थियो। तर, बाँकी सेटमा उत्कृष्ट पुनरागमन गर्दै पाकिस्तानले ३-१ को नतिजा निकालेको हो। पहिलो सेट पाकिस्तानले ३०-२८ ले गुमाएको हो। पाकिस्तानले दोस्रो सेटमा २५-१८, तेस्रो २५-२० र अन्तिम सेट २५-२१ ले जितेको थियो। पुरुष भलिबलको सेमिफाइनल खेल भाेलि, १५ आइतबार हुनेछन। पुरुष भलिबलमा आयोजक नेपाल समूह चरणबाटै बाहिरिसकेको छ।