ब्याडमिन्टनमा नेपाललाई पदक पक्का
<p>पोखरा।<span data-offset-key="5u4pq-0-0"><span data-text="true">पोखरा रंगशालामा जारी १३औं सागअन्तर्गत ब्याडमिन्टन प्रतियाेगिताकाे टीम ईभेन्टस</span></span><span data-offset-key="5u4pq-1-0">‍</span><span data-offset-key="5u4pq-2-0"><span data-text="true">्मा नेपालले पदक पक्का गरेको छ। </span></span></p>
<p>आज नेपाली पुरूष टाेलीले भुटानलाई ३–० ले पराजित गर्दै अन्तिम चारमा स्थान बनाएको छ।</p>
<p>नेपालका नम्बर एक रत्नजित तामाङले भुटानका अनिश गुरुङलाई २१–६, २१–९ ले पराजित गर्दा दीपेश धामीले नैदुप दोर्जेलाई २१–१३, २१–१४ ले हराएका थिए।</p>
<p>त्यस्तै उदीयमान खेलाडी प्रिन्स दाहालले नोर्वु ड्रढुललाई २१–१२, २१–५ ले पराजित गर्दै टीम इभेन्ट्समा नेपालको पदक पक्का गरेका थिए।</p>
<p>त्यस्तै महिला टोलीले पनि बंगलादेशलाई समान ३–० को नतिजामा हराउँदै पदक पक्का गरेका हुन्।</p>
<p>नङ्गशल देवी तामाङले बंगलादेशकी साल्पा अख्तरलाई २१–१८, १५–२१, २१–१७ को सेटमा हराउँदा रसिला महर्जनले एलिना सुल्तानालाई २८–२६, २१–१९ ले पराजित गरिन्।</p>
<p>जेशिका गुरुङले विस्त्री खातुनलाई २१–१८, २२–२० ले पराजित गरेपछि महिलातर्फको टीम इभेन्ट्समा पनि नेपालको पदक पक्का भएको हो।</p>
<p>नेपालका महिला र पुरुष दुवै टोलीले फाइनल प्रवेशका लागि अब श्रीलंकासँग प्रतिस्पर्धा गर्नेछ।</p>
<p><strong>ट्रायथलनको प्रतिस्पर्धा भोलिबाट</strong></p>
<p>पोखरामै हुने ट्रायथलनका खेलहरू खेलको भोलिबाट शुरू हुनेछन्।</p>
<p>बिहान हुने ईलाईट स्प्रिन्ट प्रतिस्पर्धामा नेपाल, श्रीलंका र भारतका खेलाडीहरूले प्रतिस्पर्धा गर्नेछन्।</p>
<p>पुरुषतर्फ नेपालका नितेश मानन्धर र वसन्त थारु तथा महिलातर्फ सोनी गुरुङ र निर्जला ताम्राकारले प्रतिस्पर्धा गर्नेछन्।</p>
<p>खेलाडीहरूले ७५० मिटर पौडी, २० किलोमिटर साइकल र ५ किलोमिटर दौड पूरा गर्नेछ।</p>
<p>फेवातालमा हुने प्रतिस्पर्धाका लागि सम्पूर्ण तयारी पूरा भएको ट्रायथलन संघले जनाएको छ। दुई स्वर्ण पदकको छिनोफानो भोलि नै हुनेछ।</p>
<p>प्रतियोगितामा नेपाल, भारत र श्रीलंका गरी तीन देशको सहभागिता छ।</p>
.jpg)
