खेलकुदको बजेटमा मन्त्रीहरूलाई दौरा-सुरुवाल
<p>काठमाडौं। मन्त्री भएर शपथ खाँदासमेत गृहमन्त्री रामबहादुर थापाले दौरा-सुरुवाल लगाएनन्।</p>
<p>चिनियाँ राष्ट्रपति सी चिनफिङको स्वागतमा विमानस्थलमा उपस्थित हुँदा अनिवार्य रूपमा दौरा-सुरुवाल लगाउन प्रधानमन्त्रीले निर्देशन दिँदा पनि मन्त्री थापाले अस्वीकार गरे। </p>
<p>तर, १५ मंसीरमा रंगशालामा उनी अचानक दौरा–सुरुवालमा आए, यो दौरा-सुरुवाल दक्षिण एशियाली खेलकुद (साग) आयोजक समितिको तर्फबाट उनले निःशुल्क पाएका थिए। </p>
<p>गृहमन्त्रीलाई मात्र होइन, उपप्रधानमन्त्री तथा रक्षमन्त्री ईश्वर पोखरेल, परराष्ट्रमन्त्री प्रदीप ज्ञवाली, सूचना तथा सञ्चारमन्त्री गोकुल बाँस्कोटा, खेलकुदमन्त्री जगत विश्वकर्मालगायत ४० जना भीआइपीले सित्तैमा दौरा–सुरुवाल पाएका छन्।</p>
<p>सागका लागि विनियोजित बजेटबाट उनीहरूले छालाको कालो जुत्ता, मोजा र टोपीसम्म पाएको आजको नयाँ पत्रिकामा समाचार छापिएको छ। </p>
<p>तर, दुर्भाग्य। नेपाली खेलाडीले दौरा–सुरुवालमा मार्चपास गर्ने भनिएकोमा क्रिकेट खेलाडीका लागि दौरा सुरुवाल सिलाउन नभ्याइएको भन्दै उनीहरूलाई ट्रयाक-सुटमै हिँडाइएको थियो। </p>
<p>खेलकुदको पैसा दुरुपयोग भएको भन्दै अर्थमन्त्री युवराज खतिवडाले दौरा–सुरुवाल अस्वीकार गरेका छन्।</p>
<p>उनले सागको नाममा भएको खर्च विवरण हेरेर अनियमिततालाई अस्वीकार गर्न अर्थका अधिकारीहरूसँग अनौपचारिक छलफल पनि गरेका छन्।</p>
<p>“हामीले साग आयोजनाका लागि गठित उच्चस्तरीय निर्देशन समितिमा रहनुभएका सबै पदाधिकारीलाई कोटसहितको पोशाक दिएका हौँ”, १३ औँ साग सचिवालयका प्रमुख कमल खनालले भने। </p>
प्रतिक्रिया दिनुहोस्
.jpg)
