जीप दुर्घटनामा मृतकको सङ्ख्या १५ पुग्यो
<p>बाग्लुङ। बाग्लुङको बडिगाड गाउँपालिका–७ भिमगिठेको घोकर्नामा १७ मंसीरमा भएको जीप दुर्घटनामा मृत्यु हुनेको सङ्ख्या १५ पुगेको छ। </p>
<p>गुल्मीको इश्मा गाउँपालिकाबाट बाग्लुङको निसीखोला गाउँपालिकाका लागि छुटेको जाँदै गरेको ग १ ज ५२१९ नम्बरको जीप मध्यपहाडी लोकमार्गको बाग्लुङ बुर्तिवाङ सडक खण्डको छेउबाट करीब तीन सय मिटर तल बडिगाड खोलामा खस्दा बेपत्ता भएका इश्मा गाउँपालिका–४ का ६५ वर्षीय धनबहादुर कार्कीको आज मृत अवस्थामा शव फेला परेको छ। </p>
<p>कार्कीको शव दुर्घटनास्थल भन्दा केही तल बडिगाड-७ दिच्छेमा खोलाले बगाएको अवस्थामा फेला पारिएको स्थानीय पत्रकार दिनेश शर्माले बताए। दुर्घटनामा परी घटनास्थलमै ज्यान गुमाएका १४ जनाकै शव परिवारले बुझेर सामूहिक दाहासंस्कार गरिसकेका छन्। </p>
<p>दुर्घटनामा गम्भीर घाइते भएका नवलपरासी बर्दघाट नगरपालिका–२ का वर्षीय २१ वर्षीय जीवन कार्की, गुल्मी इश्मा गाउँपालिका– ४ का मृतक सूचना कार्कीका चार वर्षीय छोरा हिमाल कार्की र सोही ठाउँ बस्ने २४ वर्षीया निमा केसीको महाराजगञ्जस्थित त्रिवि शिक्षण अस्पतालमा उपचार भइरहेको छ।</p>
<p>घाइते तिनै जनालाई ढोरपाटनस्थित बुर्तिवाङ अस्पतालमा सामान्य उपचार पश्चात हेलिकप्टरमार्फत् काठमाडौँ लगिएको थियो। दुर्घटनामा परेका सबै निसीखोलाको बायखोलामा कार्की बन्धुहरूको आज हुने भनिएको कूलपूजाका लागि जाँदै थिए।</p>
प्रतिक्रिया दिनुहोस्
.jpg)
